މިފެށޭ 2022 ވަނަ އަހަރުގެ ބަންދު ދުވަސްތަކަށް 4 ދުވަސް އިތުރުކޮށްފިއެވެ.

އަންނަ އަހަރުގެ ބަންދު ދުވަސްތަކަށް 4 ދުވަސް އިތުރު ކުރުމަށް ނިންމާފައިވަނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހެވެ. އަދި މިގޮތަށް ނިންމަވާފައިވާތީ މިކަން މިއަދު ވަނީ ރައީސުލްޖުމްހޫރިއްޔާގެ އޮފީހުން އިއުލާންކޮށްފައެވެ.

އެގޮތުން 2022 ވަނަ އަހަރުގެ ބަންދު ދުވަސްތަކަށް އިތުރު ކުރި ދުވަސްތަކަކީ 5 މޭ، 13 ޖުލައި، 14 ޖުލައި އަދި 28 ޖުލައި، މި ދުވަސްތަކެވެ.

މީގެއިތުރުން ބަންދު ކުރަން ނިންމި ދުވަސްތަކުގެ ތެރެއިން މޭ 5 ހިމެނެނީ ފިތުރު އީދު ބަންދުގެ ތެރޭގައެވެ. ލޭބަރ ޑޭ އަދި ފިތުރު އީދު ދުވަހާއެކު އެ ހަފުތާގައި ބަންދު ނޫން ދުވަހެއްގެ ގޮތުގައި ކުރިން އޮތީ މޭ މަހުގެ 5 ވަނަ ދުވަސް އެކަންޏެވެ. އެގޮތުން މި ދުވަސް ބަންދު ކުރުމާއެކު އެހަފުތާ އެއްކޮށް ސަރުކާރު ބަންދުވާނެއެވެ.

އަންނަ އަހަރުގެ އަޟުޙާ އީދު ދުވަހަކީ ޖުލައި 9 އެކެވެ. މިއާއެކު ޖުލައި 13 އަދި 14 ވަނަ ދުވަސް ވެސް އީދާގުޅުވައިގެން ބަންދު ކުރަން ސަރުކާރުން ވަނީ ނިންމާފައެވެ. މި ނިންމުމާއެކު، އެ ހަފުތާ އެއްކޮށް ސަރުކާރު ބަންދު ވާނެއެވެ.

ޖުލައި މަހުގެ ދެވަނަ ހަފުތާ އީދަށް ބަންދުވުމަށްފަހު ޖެހިގެން އަންނަ ހަފްތާއަކީ ސަރުކާރު މަސައްކަތްކުރާ ހަފުތާއެކެވެ. އެއަށްފަހު ކުރިއަށް ޖުލައި މަހުގެ ތިންވަނަ ހަފުތާގެ އަންގާރަ ދުވަހާއި ބުދަ ދުވަހަކީ މިނިވަން ދުވަހުގެ މުނާސަބާ ފާހަގަ ކުރާ ބަންދު ދެދުވަހެވެ. އެއާއެކު ޖުލައި މަހުގެ 28 ވަނަ ދުވަސް ބަންދު ކުރަނީ މިނިވަން ދުވަހާ ގުޅިގެން ލިބޭ ބަންދު އިތުރު ކުރުމަށެވެ.