މާލޭގެ މަގުތަކުގައި ފެން ބޮޑުވުމުން އެއީ ފެންކުންފުނީގެ މައްސަލައެއް ކަމަށް ވިދާޅުވެ ފެން ހިންދަން ބޭނުންކުރާ ޕަމްޕުތައް ސިޓީ ކައުންސިލާ ހަވާލުކުރަން މާލޭ ސިޓީގެ މޭޔަރު ޑރ. މުޙައްމަދު މުއިއްޒު ގޮވާލައްވައިފިއެވެ.

މޭޔަރު މުޢިއްޒު މިމޭރުމުން ގޮވާލައްވާފައިވަނީ އިއްޔެ މާލެއަށް ކުރި ވިއްސާރާގައި މާލޭގެ ބައެއް މަގުތަކުގައި ފެން ބޮޑުވެ ފެންގަނޑު ނުހިނދި ގިނައިރުވުމުންނެވެ. އެއީ އެމް ޑަބްލިޔޫ އެސް ސީގެ މައްސަލައެއް ކަމަށް ތުހުމަތުކުރަށްވައި ޑރ. މުޢިއްޒު ވިދާޅުވީ އެކަން އެގޮތަށް ދިމާވީ މާލޭގެ އެކި ސަރަޙައްދުތަކުގައި ބައްޓާފައިވާ ފެން ހިންދަން ބޭނުންކުރާ ޕަމްޕުތައް ރަނގަޅަށް ނުބެލެހެއްޓޭތީ ކަމަށެވެ. އެހެންކަމުން އެ ޕަންޕްތައް ސިޓީ ކައުންސިލާ ޙަވާލުކުރަންޖެހޭ ކަމަށް މޭޔަރު ވިދާޅުވިއެވެ.

މަގުތަކުގައި މިފަހަރު ފެން ނުހިނދި ގިނައިރުވީ ފެންހިންދާ ޕަންޕުތައް ރަނގަޅަށް ނުބަލަހައްޓާތީ ކަމަށް ޑރ. މުޢިއްޒު ތުހުމަތު ކުރެއްވި ނަމަވެސް މުއިއްޒުގެ މިވާހަކައަށް މީސް މީޑިއާގައި ރައްދު ދިން ގިނަ މީހުން ބުނެފައިވަނީ މަގުތަކުގައި ފެން ނުހިނދި ގިނައިރުވީ މަގުތަކުގެ ކާނުތައް ރަނގަޅަށް ސާފު ނުކުރާތީ ކަމަށެވެ. ގޯސްކޮށް ހިނގާ ކޮންމެ ކަމެއް އެހެން ފަރާތްތަކުގެ "ބޮލަށް ކަނޑާލުމަކީ" މާލޭ މޭޔަރުގެ އާދައެއް ކަމަށް ބައެއް މީހުން ބުނެފައި ވެއެވެ.

މާލެ ފެންބޮޑުވާ މައްސަލައަކީ އެއްވެސް ސަރުކާރަކަށް ހައްލު ގެނެވިފަައިނުވާ ބޮޑު މައްސަލައެކެވެ. ޥެރިރަށް މާލޭގައި އުޅޭ ރައްޔިތުންނަށް އެކަމުގެ ސަބަބުން ވަރަށް ބޮޑެތި ދަތި އުދަނގޫ ތަކްލީފް ތަކެއް ވަނީ އުފުލަންޖެހިފައެވެ. މީގެއިތުރުން މަގުތަކުގެ ކާނުތައް ރަނގަޅަށް ސާފު ނުކުރާތީ ކާނުތަކުގައި ފެންހަރުލާފައި ގިނަ ދުވަސް ތަކެއް ވާންދެން ހުރުމުގެ ސަބަބުން މަދިރި ގިނަވެގެން ވެސް ވަރަށް ބޮޑެތި އުނދަޫތަކާއި ކުރިމަތިވާ ކަމަށް ބައެއް މީހުން ބުނެފައި ވެއެވެ.