ފަތުރުވެރިކަމުގެ ދާއިރާގައި ދޭ އެންމެ ޝަރަފުވެރި އެވޯޑްކަމަށްވާ، ވޯލްޑް ލީޑިން ޑެސްޓިނޭޝަންގެ އެވޯޑް މިފަހަރުވެސް ދިވެހިރާއްޖެއިން ހޯދައިފިއެވެ.

މިއީ ފަތުރުވެރިކަމުގެ ދާއިރާގައި ދުނިޔޭގައި ދޭ އެންމެ ޝަރަފްވެރި އެވޯޑެވެ. މިއީ މި އެވޯޑް ރާއްޖޭގެ ފަތުރުވެރިކަމުގެ ދިގު ތާރީހުގައި ލިބުނު ދެވަނަ ފަހަރެވެ. މިދިޔަ އަހަރުވެސް ރާއްޖެއިން ވަނީ މި އެވޯޑް ހޯދާފައެވެ.

މި އެވޯޑް ރާއްޖެއަށް ލިބިފައިވަނީ މިއަދު ވާޗުއަލްކޮށް ބޭއްވި ވޯލްޑް ޓްރެވަލް އެވޯޑްސް 2021 ގެ ގްރޭންޑް ފިނާލޭ ހަފްލާގައެވެ. މި އެވޯޑް ރާއްޖެއަށް ލިބިފައިވަނީ ދުނިޔޭގައި ފަތުރުވެރިކަމަށް މަޝްހޫރު 18 މަންޒިލަކާއި ވާދަކޮށްގެންނެވެ.

މިއަހަރުގެ ވޯލްޑް ޓްރެވަލްސް އެވޯޑްސްގައި ވޯލްޑް ލީޑިންގ ޑެސްޓިނޭޝަންގެ އެވޯޑްގެ އިތުރުން، އިންޑިއަން ލީޑިންގ ބީޗު ޑެސްޓިނޭޝަން، އިންޑިއަން އޯޝަން ލީޑިންގ ޑެސްޓިނޭޝަން، އިންޑިއަން އޯޝަންސް ލީޑިންގ ޑައިވް ޑެސްޓިނޭޝަން އަދި އިންޑިއަން އޯޝަން ލީޑިންގ ޓުއަރިސްޓް ބޯޑުގެ އެވޯޑްވެސް ރާއްޖެއަށް ވަނީ ލިބިފައެވެ.

ރާއްޖެއަށް ލިބުނު އެވޯޑްތަކުގެ އިތުރުން، ރާއްޖޭގައި ހިންގާ ބައެއް ރިސޯޓްތަކާއި ގެސްޓްހައުސްތަކާއި ސަފާރީތަކަށްވެސް ވަނީ ވޯލްޑް ޓްރެވަލްސް އެވޯޑްސްގައި ޝަރަފުވެރި އެވޯޑްތަކެއް ލިބިފައެވެ. އެގޮތުން ރާއްޖޭގެ 7 ރިސޯޓަކުން އެކި ދާއިރާތަކުން އެވޯޑު ހާސިލުކޮށްފައިވާއިރު، ހުޅުލޭ އައިލޭންޑް ހޮޓެލް ވަނީ ލީޑިން އެއާޕޯޓު ހޮޓެލްގެ މަޤާމު ހާސިލުކޮށްފައެވެ.

ވޯލްޑް ޓްރެވެލް އެވޯޑްސްއަކީ 1993 ވަނަ އަހަރުން ފެށިގެން ދެމުން އަންނަ ފަތުރުވެރިކަމުގެ ސިނާޢަތުގެ އެންމެ ޝަރަފްވެރި އެވޯޑެވެ.