އައްޑޫ ސިޓީގެ ހިތަދޫ އިކުއަޓޯރިއަލް ހޮސްޕިޓަލް ކައިރިން ދޫކޮށްފައިވާ 35 ގޯއްޗެއް، ދައުލަތަށް ނެގުމަށް އައްޑޫ ސިޓީ ކައުންސިލުން ނިންމާފައިވާ ނިންމުން ރަނގަޅުކަމަށް ހައިކޯޓުން ކަނޑައަޅައިފިއެވެ.

ހައި ކޯޓުން އެގޮތަށް ހުކުމްކުރީ އައްޑޫ ސިޓީ ކައުންސިލުން ގޯތިތައް ނަގަން ނިންމުމާއި ގުޅިގެން އެ ގޯތިތަކުގެ ވެރިން ކޯޓަށް ހުށަހެޅި މައްސަލަައެއް ބެލުމަށްފަހުއެެވެ. ގޯތިތައް އަތުލި މައްސަލާގައި 7 ގޯއްޗެއް ނެގުމުގައި ކައުންސިލްގެ ނިންމުން ރަނގަޅު ކަމަށް ހިތަދޫ ކޯޓުން ނިންމާފައި ވަނިކޮށް އެއާ ތަފާތުކޮށް އަނެއް ހަތް މައްސަލާގައި ހަމަ އެ ކޯޓުން ވަނީ ނިންމާފައެވެ.

އެ މައްސަލަތަކުގައި ހައި ކޯޓުން ކުރި ހުކުމުގައިވަނީ މީހުންގެ މުދާ އަތުލުން ގާނޫނު އަސާސީން މަނާ ކުރިޔަސް، އާންމު ފައިދާއަކަށްޓަކައި ޝަރީއަތް މެދުވެރިކޮށް ބަދަލު ދިނުމަށްފަހު މުދަލެއް ދައުލަތަށް ނެގިދާނެ ކަމަށް ގާނޫނުު އަސާސީގައި ބުނެފައިވާ ކަމަށެވެ. އަދި ގޯތިތައް އަތުލަން އައްޑޫ ސިޓީ ކައުންސިލުން ނިންމި ނިންމުމުގައި ވެސް އޮތީ ގޯތިތަކުގެ ވެރިފަރާތްތަކަށް ގާނޫނާ އެއްގޮތަށް ދޭންޖެހޭ ބަދަލެއް ދިނުމަށްފަހު ގޯތިތައް އަތުލުން ކަމަށާއި އެހެންވެ، އެއީ ގާނޫނާ ޚިލާފް ނިިންމުމެއް ނޫން ކަމަށް އެ ހުކުމުގައިވެ އެވެ.

އިސް ފަނޑިޔާރު ހާތިފް ހިލްމީ އާއި ފަނޑިޔާރު އަބްދުއްރައޫފް އިބްރާހިމްގެ އިތުރުން ފަނޑިޔާރު މުހައްމަދު ފައިސަލް ބެއްލެވި މައްސަލާގައިވަނީ މުހިންމު އިތުރު ނިންމުމެއްވެސް ނިންމަވާފައެވެ. އެގޮތުން އެއް ކޯޓަކުން ދެގޮތަށް މައްސަލަތައް ނިންމީ ދެ ފަނޑިޔާރަކު އެ މައްސަލަތައް ބެލުމުން ކަމަށާއި އެކަމަކު ސުޕްރީމް ކޯޓުން ކުރިން ނިންމާފައިވާ ގޮތުން އެފަދަ ހާލަތްތަކުގައި އެ ހުރިހާ މައްސަލަތަކެއް ބަލަން ޖެހޭނީ އެއް ފަނޑިޔާރަކު ކަމަށް ހައިކޯޓުގެ ޙުކުމްގައިވެއެވެ.

އައްޑޫސިޓީ ކައުންސިލުން ނިންމާފައިވަނީ އައްޑޫ އިކުއަޓޯރިއަލް ހޮސްޕިޓަލް ކައިރިން ދޫކޮށްފައިވާ 35 ގޯއްޗެއް ދައުލަތަށް ނެގުމަށްފަހު އޭގެ ބަދަލުގައި ހިތަދޫ ސްޓޭޑިއަމް ސަރަހައްދުން އެފަރާތްތަކަށް ބިން ދޫކުރުމަށެވެ. ޑެޕިއުޓީ މޭޔަރު މުހައްމަދު ޝުއާއު ހުށައެޅުއްވި އެ ހުށައެޅުމަށް 10 މެމްބަރަކުވަނީ ތާއިދުކޮށްފައެވެ.