މިމަހު ރާއްޖެއަށް ޒިޔާރަތްކުރި ފަތުރުވެރިންގެ ޢަދަދު ލައްކައެއް ފަހަނައަޅައިފިއެވެ.

ފަތުރުވެރިކަމާއި ބެހޭ ވުޒާރާގެ ތަފާސް ހިސާބުތައް ދައްކާގޮތުން މިމަހުގެ 22 ވަނަ ދުވަހުގެ ނިޔަލަށް ރާއްޖެއަށް ވަނީ 113،367 ފަތުރުވެރިން ޒިޔާރަތްކޮށްފައެވެ. މިއީ މިއަހަރު ރާއްޖެއަށް 1 ލައްކައަށްވުރެ ގިނަ ފަތުރުވެރިން ޒިޔާރަތްކުރާތާ 7 ވަނަ މަހެވެ. މިއަހަރުގެ މިހާތަނަށް ރާއްޖެއަށް ވަނީ 1,271,020 ފަތުރުވެރިން ޒިޔާރަތްކޮށްފައެވެ.

ތަފާސް ހިސާބުތައް ދައްކާގޮތުން މިދިޔަ ޖުލައިމަހުން ފެށިގެން ކޮންމެ މަހަކުވެސް ރާއްޖެއަށް ލައްކައަށްވުރެ ގިނަ ފަތުރުވެރިން ޒިޔާރަތްކުރެއެވެ. ރާއްޖެއަށް މިމަހު އެވްރެޖްކޮށް ކޮންމެ ދުވަހަކު 5،153 ފަތުރުވެރިން ޒިޔާރަތްކުރެއެވެ. މިއީ 2019 ވަނަ އަހަރާއި އަޅާ ބަލާއިރު އިތުރު އަދަދެކެވެ.

ރާއްޖެއަށް މިހާރު ޒިޔާރަތްކުރާ ފަތުރުވެރިންގެ 22.5 އިންސައްތައަކީ އިންޑިއާގެ ފަތުރުވެރިންނެވެ. ދެވަނައަށް އެންމެ ގިނަ އަދަދަކަށް އަންނަނީ 16.9 އިންސައްތަ ހިއްސާއަކާއެކު ރަޝިއާގެ ފަތުރުވެރިންނެވެ.

ރާއްޖޭގެ ފަތުރުވެރިކަން އަލުން ހަމައަކަށް އެޅެމުން އަންނައިރު ކޯވިޑާއި ގުޅިގެން ރާއްޖޭގެ ބޯޑަރުތައް 110 ދުވަހަށް ބަންދު ކުރުމަށް ފަހު އަލުން ހުޅުވީ 2020 އަހަރުގެ ޖުލައި މަހުގެ 15 ވަނަ ދުވަހުއެވެ. މިދިޔަ އަހަރު ނިމުނުއިރު ރާއްޖެއަށް އައިސްފައިވަނީ 555،494 ފަތުރުވެރިންނެވެ.

ހަމައެއާއެކު ފަތުރުވެރިކަމުގެ ދާއިރާގައި ދޭ އެންމެ ޝަރަފުވެރި އެވޯޑްކަމަށްވާ، ވޯލްޑް ލީޑިން ޑެސްޓިނޭޝަންގެ އެވޯޑް މިއަހަރުވެސް ދިވެހިރާއްޖެއިން ވަނީ ހޯދައިފައެވެ. މިއީ މިއެވޯޑް ޖެހިޖެހިގެން ރާއްޖެއިން ޙާސިލްކުރި ދެވަނަ އަހަރެވެ.