މަސައްކަތް ކުރަމުން މިދަނީ ރަނގަޅަށް ކަމަށް ބުނެ އެސީސީގެ މެންބަރުން 23 ނުކުތާގެ މައްޗަށް އެކުލެވޭ ދިގު ބަޔާނެއް ނެރެފިއެވެ.

އެންޓި ކޮރަޕްޝަން ކޮމިޝަން، އޭސީސީގެ މެންބަރުން ވަކިކުރުމާމެދު ގޮތެއް ނިންމުމަށް ބާއްވާ މިނިވަން މުއައްސަސާތަކުގެ ކޮމިޓީ ބައްދަލުވުން މިއަދު ހަވީރަށް ތާވަލުކޮށްފައި ވަނިކޮށް އޭސީސީން ނެރެފައިވާ ބަޔާނުގައި ވަނީ އެ ކޮމިޝަން ފެއިލް ކޮށްލުމަށް ގިނަ ފަރާތްތަކެއް މަސައްކަތް ކުރިކަމަށް ތުހުމަތު ކޮށްފައެވެ. އެގޮތުން އޯޑިޓް އޮފީހާއި މަޖިލީހަށް ގިނަ ތުހުމަތުތަކެއް ކޮށްފައިވެއެވެ.

އެގޮތުން އޮޑިޓް އޮފީހުން ކުރި ޕަރފޮމަންސް އޮޑިޓްގައި މިހާރު ހިނގަމުންދާ މެންބަރުންގެ ދައުރުގެ ތެރެއިން އޮޑިޓް ކުރަނީ އެންމެ 3 މަސް ދުވަސްކަމަށް ބުނުމަށްފަހު އޮޑިޓުގެ ސްކޯޕް ބަދަލުކޮށް، 2020 ވަނަ އަހަރުގެ ޖުލައި މަހުގެ ނިޔަލަށް ސްކޯޕު ފުޅާކޮށްފައިވަނީ ކޮމިޝަނާ މަޝްވަރާކޮށް އެއްބަސްވިގޮތާ ޚިލާފަށްކަމަށް ކޮމިޝަނުން ވަނީ ބުނެފައެވެ.

އޭސީސީން ބުނީ ކޮމިޝަނުގެ މިހިނގާ ދައުރުގެ މެމްބަރުން މަޤާމާ ޙަވާލުވިއިރު އިވެލުއޭޝަން މަރުހަލާގައި ފިޔަވަޅެއް ނޭޅިހުރި 400 އަށްވުރެ ގިނަ ޝަކުވާ އޮތް ކަމަށެވެ. އަދި ތަޙުޤީޤު މަރުހަލާގައި 500 އަށްވުރެ ގިނަ މައްސަލަ އޮތްކަމަށް ކޮމިޝަންގެ ބަޔާނުގައިވެއެވެ.

މީގެ އިތުރުން މުވައްޒަފުން ތަމްރީނުކުރުމަށް ބޭނުންވާ ބަޖެޓު ހުށަހެޅުމަށް 2020 އަދި 2021 ވަނަ އަހަރު ފުރުޞަތު ލިބިފައިނުވާކަމަށްވެސް އޭސީސީން ވަނީ ބުނެފައެވެ. އެކަމާގުޅިގެން އިންވެސްޓިގޭޓަރުންނަށް ފެންވަރު ރަނގަޅު ތަމްރީނުތައް ދިނުމަށް ބޮޑެތި ހުރަސްތަކެއް ކުރިމަތިވި ކަމަށްވެސް އޭސީސީގެ ބަޔާނުގައިވެއެވެ. އަދި ކޭސް މެނޭޖްމަންޓް ސިސްޓަމް ޤާއިމްކުރުމަށްވެސް ބަޖެޓް ނުލިބޭކަމަށް ކޮމިޝަނުން ވަނީ ބުނެފައެވެ.

ހަމައެއާއެކު އެމް.އެމް.ޕީ.އާރު.ސީގެ މައްސަލައިގެ ތަޙުޤީޤަށް ޚާއްޞަ ސަމާލުކަމެއް ދީގެން ކުރިއަށްގެންދިއުމަށްޓަކައި މައްސަލައިގެ ތަޙުޤީޤަށް ކޮމިޝަނުގެ 7 އިންވެސްޓިގޭޓަރެއް ޚާއްޞަކުރުމުން، ކޮމިޝަނުން ބަލަމުން ދިޔަ ބޮޑެތި އެހެން މައްސަލަތަކުގެ ތަޙުޤީޤުތަކަށް ބޮޑެތި ގޮންޖެހުންތަކެއް ކުރިމަތިވިކަމަށް ބަޔާނުގައިވެއެވެ. ނަމަވެސް އެކަމަށް އޮޑިޓު ރިޕޯޓުގައި ރިއާޔަތްކޮށްފައިނުވާކަމަށް ކޮމިޝަނުން ބުނެފައިވެއެވެ.

އޭސީސީން ބުނީ ތަޙުޤީޤުކުރާ އިދާރާއެއްގެ ޕަރފޯމަންސް ވަޒަންކުރާ ހަމައެކަނި މިންގަނޑު ބިނާވަނީ ތަޙުޤީޤު ކުރާ މައްސަލަތައް ޕީޖީ އޮފީހަށް ފޮނުވުމާ ނުފޮނުވުމުގެ މައްޗަށްކަމަށް ދެކުމަކީ ހަމަޖެހޭކަމެއް ނޫން ކަމަށެވެ. އެގޮތުން މައްސަލައެއްގައި ކޮރަޕްޝަންގެ ޢަމަލެއް ހިނގާފައިވާކަމަށް ޖިނާއީ މިންގަނޑަކުން ސާބިތުކުރެވޭ މިންވަރަށް ހެކި ނެތުމުން އެ މައްސަލައެއްގައި ކޮރަޕްޝަންގެ ޢަމަލެއް ނެތް ކަމަށް ނިންމާ ނިންމުމުގެ މައްޗަށް ބިނާކޮށް، އެ މައްސަލައެއްގައި ކޮމިޝަނުން ކޮށްފައިވާ މަސައްކަތަކީ ބޭކާރު މަސައްކަތެއްކަން ދޭހަވާގޮތަށް ބުނެދިނުމަކީ ޖިނާއީ ތަޙުޤީޤުގެ ވައްޓަފާޅިއާއި ތަޙުޤީޤުގެ މިންގަނޑުތަކާއި ކަން ހިނގާގޮތާމެދު ރަނގަޅަށް ހޭލުންތެރިނުވެ ބުނެފައިވާ ބުނުމެއް ކަމަށް އޭސީސީން ވަނީ ބުނެފައެވެ.

އޭސީސީން ބުނީ މައްސަލައެއްގެ ތަޙުޤީޤު ނިންމައި، ލިބިފައިވާ ހެއްކާއި ޤަރީނާއަށް ބިނާކޮށް އެ މައްސަލައިގައި ދައުވާނުކުރުމަށް ނިންމާ ކޮންމެ މައްސަލައަކީ ނަތީޖާ ނުނެރެވޭ މައްސަލަތަކެއް ނޫން ކަމަށެވެ.

އެގޮތުން ސިނަމާލެ ބްރިޖު ސަރަހައްދުގައި ނިއުޕޯޓުގެ ފަރާތުން ޢިމާރާތްކޮށްފައިވާ "ޗާޓައިމް" އެތަނުން ނެގުމަށްޓަކައި ބަދަލުގެ ގޮތުގައި ދޭން ނިންމާފައިވާ 14,493,427.00 (ސާދަ މިލިއަން ހަތަރު ސަތޭކަ ނުވަދިހަ ތިން ހާސް ހަތަރު ސަތޭކަ ހަތާވީސް) ރުފިޔާއަކީ ބަދަލުގެ ގޮތުގައި ދޭންޖެހޭނެ ފައިސާއެއްކަމަށް ނުބެލެވޭތީ އެފައިސާ ސްޓްރާޑާއަށް ނުދިނުމަށް އަންގައި، އެ ފައިސާ ދޫކުރުމުގެ ޕްރޮސެސް ހުއްޓުވާފައިވާކަން އޭސީސީން ވަނީ ފާހަގަކޮށްފައެވެ.

އަދި މެޝިން ރީޑަބަލް ނަންބަރު ޕްލޭޓް ޕްރޮޖެކްޓު އެވޯޑިންގ ޕްރޮސެސް ބާޠިލްކޮށް، އެ ޕްރޮޖެކްޓް ޙަވާލުކުރުމަށް ނިންމާފައިވާ އަގުކަމުގައިވާ 65,547,375.00 (ފަސްދޮޅަސް ފަސް މިލިއަން ފަސްސަތޭކަ ސާޅީސް ހަތް ހާސް ތިން ސަތޭކަ ހަތްދިހަ ފަސް) ރުފިޔާ، ވަކިފަރާތަކަށް ފައިދާ ލިބޭގޮތަށް އޮތް ފުރުޞަތު ބަންދުކޮށްފައިވާކަން އޭސީސީން ފާހަގަކޮށްފައިވެއެވެ.

ކޮމިޝަންގެ މިދައުރުގައި 2020 ވަނަ އަހަރު 961 އަދި 2021 ވަނަ އަހަރު 761 މައްސަލަ ނިންމާފައިވާ ކަމަށާއި ދަޢުވާކޮށްދިނުމަށް އެދި ޕީޖީ އޮފީހަށް 2020 ވަނަ އަހަރު 15 އަދި 2021 ވަނަ އަހަރުގެ މިހާތަނަށް 22 މައްސަލަ ފޮނުވާފައިވާކަމަށްވެސް އޭސީސީން ބުނެފައިވެއެވެ.

މީގެ އިތުރުން ކޮމިޝަނުގެ މަސްއޫލިއްޔަތު އަދާކުރުމުގައި ސިޔާސީގޮތުން ވަކި ފަރާތަކަށް ބުރަ ނުވާކަމަށާއި، ކޮމިޝަނަށް ނުފޫޒު ނުފޯރުވޭނެކަން ވާނީ ސާބިތުކޮށްދީފައި ކަމަށް ބަޔާނުގައިވެއެވެ. ނަމަވެސް ނިޒާމުގެ އެތެރެއިންނާއި ބޭރުން އެކި ސިފަސިފައިގައި ކޮމިޝަނުގެ މަސައްކަތްތައް ފެއިލްކޮށްލުމަށް މަސައްކަތްކޮށް އިތުބާރު ނެތްކަމަށް ފާސްކުރުމަށް މަޖިލީހުން ދެފަހަރު މަސައްކަތް ކުރިކަމަށް ބަޔާނުގައި ވަނީ ބުނެފައެވެ.

އޭސީސީން ބުނީ ކޮރަޕްޝަނާ ދެކޮޅަށް ކުރާ މަސައްކަތުގައި، އެ މަސައްކަތުގެ ތެދުވެރިކަން މިންކުރުމަށް ބޭނުންކުރެވޭ އެއް މިންގަނޑަކީ، އެ މަސައްކަތްކުރާ މީހުންނާމެދު ނަފްރަތުވެ، އެ މަސައްކަތް ނާކާމިޔާބު ކުރުވައި، އެ މަސައްކަތްކުރާ މީހުން ބަލިކަށިކޮށްލަން މަސައްކަތްކުރާ މީހުން ގިނަވުން ކަމަށެވެ.

"މި މިންގަނޑުން ބަލާއިރު، ކޮމިޝަނުން މަސްއޫލިއްޔަތު އަދާކުރަމުން މިހާތަނަށް އައިސްފައި މިވަނީ ރަނގަޅަށްކަމަށް ކޮމިޝަނުން ޤަބޫލުކުރަމެވެ. އަދި ކުރިއަށް އޮތްތާނގައިވެސް މަސައްކަތްކުރާނީ، ސިޔާސީގޮތުން ނުވަތަ އެނޫންވެސް ގޮތަކުން ނުފޫޒު ގަދަ ފަރާތަކަށް ނުލެނބި އަދި ބެލުމެއް ނެތިއެވެ." އޭސީސީގެ ދިފާޢީ ދިގު ބަޔާން ނިންމާލަމުން ބުނެފައިވެއެވެ.