މި ޑިސެމްބަރު މަހުގެ 26 ވަނަ ދުވަހު ރެކޯޑް އަދަދަކަށް ރާއްޖެއަށް ފަތުރުވެރިން ޒިޔާރަތްކޮށްފައިވާކަމަށް ފަތުރުވެރިކަމާބެހޭ ވުޒާރާއިން ހާމަކޮށްފިއެވެ.

ފަތުރުވެރިކަމާބެހޭ ވުޒާރާއިން ބުނީ މިމަހުގެ 26 ވަނަ ދުވަހު 7،098 ފަތުރުވެރިން ރާއްޖެއަށް ޒިޔާރަތް ކޮށްފައިވާ ކަމަށެވެ. އަދި މިއީ ކޯވިޑް-19 އާ ގުޅިގެން ރާއްޖޭގެ ބޯޑަރ ބަންދުކޮށް އަލުން ހުޅުވިފަހުން އެއްދުވަހެއްގައި އެންމެ ގިނަ ޢަދަދެއްގެ ފަތުރުވެރިން ރާއްޖެއަށް ޒިޔާރަތްކުރި ދުވަސްކަމަށް އެވުޒާރާއިން ހާމަކޮށްފައިވެއެވެ.

ކޯވިޑާއި ގުޅިގެން ރާއްޖޭގެ ބޯޑަރުތައް 110 ދުވަހަށް ބަންދު ކުރުމަށް ފަހު އަލުން ހުޅުވީ މިދިޔަ އަހަރުގެ ޖުލައި މަހުގެ 15 ވަނަ ދުވަހުއެވެ. މިދިޔަ އަހަރު ނިމުނުއިރު ރާއްޖެއަށް އައިސްފައިވަނީ 555،494 ފަތުރުވެރިންނެވެ.

ފަތުރުވެރިކަމާބެހޭ ތަފާސް ހިސާބުތައް ދައްކާގޮތުން އިއްޔެގެ ނިޔަލަށް ރާއްޖެއަށް 1،294،492 ފަތުރުވެރިން ވަނީ ޒިޔާރަތްކޮށްފައެވެ. ރާއްޖެއަށް މިހަރުގެ މިހާތަނަށް 1.2 މިލިއަން ފަތުރުވެރިން ޒިޔާރަތްކޮށްފައިވާއިރު މިހާރު ސަރުކާރުން ކަނޑައަޅާފައިވާ 1.3 މިލިއަން ފަތުރުވެރިންގެ އަމާޒަށް ވާސިލްވުމަށްޓަކައި ރާއްޖެއަށް އިތުރަށް ޒިޔާރަތް ކުރަން ޖެހެނީ 5،508 ފަތުރުވެރިންނެވެ.

ރާއްޖެއަށް މިހާރު ޒިޔާރަތްކުރާ ފަތުރުވެރިންގެ 22.5 އިންސައްތައަކީ އިންޑިއާގެ ފަތުރުވެރިންނެވެ. ދެވަނައަށް އެންމެ ގިނަ އަދަދަކަށް އަންނަނީ 16.9 އިންސައްތަ ހިއްސާއަކާއެކު ރަޝިއާގެ ފަތުރުވެރިންނެވެ.

ހަމައެއާއެކު ފަތުރުވެރިކަމުގެ ދާއިރާގައި ދޭ އެންމެ ޝަރަފުވެރި އެވޯޑްކަމަށްވާ، ވޯލްޑް ލީޑިން ޑެސްޓިނޭޝަންގެ އެވޯޑް މިއަހަރުވެސް ދިވެހިރާއްޖެއިން ވަނީ ހޯދައިފައެވެ. މިއީ މިއެވޯޑް ޖެހިޖެހިގެން ރާއްޖެއިން ޙާސިލްކުރި ދެވަނަ އަހަރެވެ.