މި އަހަރުގެ އަމާޒަކީ ރާއްޖެއަށް ދެމިލިއަން ފަތުރުވެރިން ގެނައުން ކަމަށް ފަތުރުވެރިކަމާބެހޭ ވަޒީރު ޑރ. ޢަބްދުالله މައުސޫމް ވިދާޅުވެއްޖެއެވެ.

ރާއްޖެއަށް މިއަހަރު ޒިޔާރަތްކުރި ފުރަތަމަ ފަތުރުވެރިޔާއަށް މަރުޙަބާކިޔުމަށް ވެލާނާ އިންޓަނޭޝަނަލް އެއަރޕޯޓްގައި މިއަދު ވަނީ ޚާއްސަ ޙަރަކާތްތަކެއް ބާއްވާފައެވެ. މިއަހަރު ރާއްޖެއަށް ޒިޔާރަތްކުރި ފުރަތަމަ ފަތުރުވެރިއަކީ އިނގިރޭސިިލާތުގެ އަންހެނެއްކަމަށްވާ ޖޯޖީނާއެވެ. އޭނާ ރާއްޖެއައީ އޭނާގެ ފިރިމީހާ ސްޓީވްއާ އެކުގައެވެ. މިއީ އެދެމީހުން ރާއްޖެ އައި 2ވަނަ ފަހަރެވެ.

މިއަހަރުގެ ފުރަތަމަ ފަތުރުވެރިޔާ މިއަދު ރާއްޖެއަށް ޒިޔާރަތް ކޮށްފައިވާއިރު މިދިޔަ އަހަރަށް ރާއްޖެއިން އަމާޒުހިފި 1.3 މިލިއަން ފަތުރުވެރިން ރާއްޖެއަށް ގެނައުމުގެ އަމާޒަށް ވާސިލްވުމާ ގުޅިގެން ޑރ. މައުސޫމް ވިދާޅުވެފައިވަނީ 2022 ވަނަ އަހަރުގެ އަމާޒަކީ 2 މިލިއަން ފަތުރުވެރިން ރާއްޖެއަށް ގެނައުމަށް މަސައްކަތް ކުރުން ކަމަށެވެ. އަދި އެންމެ ގުޅިގެން ރާއްޖެއަށް އެކަން ޙާސިލްކުރެވޭނެ ކަމަށް ޑރ. މައުސޫމް ވިދާޅުވިއެވެ.

މި އަހަރަކީ ރާއްޖޭގެ ފަތުރުވެރިކަމަށް 50 އަހަރު ފުރޭ އަހަރަށް ވާއިރު، ޓޫރިޒަމް މިނިސްޓްރީން ވަނީ މިއަދު ރާއްޖޭގައި ހޯމްސްޓޭ ފަތުރުވެރިކަން ތަޢާރަފް ކުރުމަށްވެސް ނިންމާފައެވެ. އެކަމަށްޓަކައި ބާއްވާ ޚާއްސަ އިވެންޓް މިއަދު މ. ދިއްގަރުގައި އޮންނާނެއެވެ.

ސަރުކާރުން މިދިޔަ އަހަރު އެންމެ ފުރަތަމަ އަމާޒު ހިފީ އެއް މިލިއަން ފަތުރުވެރިން ގެނައުމަށެވެ. އޭގެ ފަހުން އަމާޒު ހިފީ 1.3 މިލިއަން ފަތުރުވެރިން ގެނައުމަށެވެ. އެއަމާޒު ރާއްޖެއިން މިދިޔަ އަހަރު ވަނީ ޙާސިލްކޮށްފައެވެ.

ކޮވިޑާ ގުޅިގެން ރާއްޖޭގެ ބޯޑަރުތައް ބަންދުކުރުމަށްފަހު އަލުން ހުޅުވާލައި ރާއްޖޭގެ ފަތުރުވެރިކަން މިހާރު ވަނީ ކޮވިޑުގެ ކުރީގައި އޮތް ހާލަތަށް ރުޖޫއަވެފައެވެ. ކޯވިޑާއި ގުޅިގެން ރާއްޖޭގެ ބޯޑަރުތައް 110 ދުވަހަށް ބަންދު ކުރުމަށް ފަހު އަލުން ހުޅުވީ 2020 ވަނަ އަހަރުގެ ޖުލައި މަހުގެ 15 ވަނަ ދުވަހުއެވެ. 2020 ވަނަ އަހަރު ނިމުނުއިރު ރާއްޖެއަށް އައިސްފައިވަނީ 555،494 ފަތުރުވެރިންނެވެ.

ރާއްޖެއިން މިދިޔަ ދެއަހަރު ވަނީ ފަތުރުވެރިކަމުގެ ދާއިރާގައި ދޭ އެންމެ ޝަރަފުވެރި އެވޯޑްކަމަށްވާ، ވޯލްޑް ލީޑިން ޑެސްޓިނޭޝަންގެ އެވޯޑް ހޯދައިފައެވެ.