ޒުވާނުން ވިޔަފާރީގެ ދާއިރާއަށް ނެރުމަށް ކުރިއަށްގެންދިޔަ "ޕިޗްއަޕް ޔޫތު އޮންޓްޕްރިނިއަރޝިޕް ޗެލެންޖު" ކާމިޔާބު ކުރި 23 ވިޔަފާރިއަކަށް 12 މިލިއަނަށްވުރެ ގިނަ ރުފިޔާ ހިލޭ ދޫކޮށްފިއެވެ.

"ޕިޗްއަޕް ޔޫތު އޮންޓްޕްރިނިއަރޝިޕް ޗެލެންޖު"އަކީ މީރީ ޕްރޮޖެކްޓުގެ ފަރާތުން ޒުވާނުންނަށް ޚާއްސަކޮށްގެން އުފެއްދުންތެރި ވިޔަފާރީގެ ޚިޔާލެއް ހުށަހަޅައި، އެ ޚިޔާލަށް ދިރުން ގެނެސްދީ، ކާމިޔާބު ވިޔަފާރިއެއް އުފެއްދުމަށް ހިންގާ ޗެލެންޖެކެވެ.

މީރީ ޕްރޮޖެކްޓަކީ ޒުވާނުންނަށް ވަޒީފާގެ ފުރުސަތު ތަނަވަސްކޮށްދީ، ބާރުވެރިކޮށް، ކާމިޔާބު ބަޔަކަށް ހެދުމަށް ވޯލްޑްބޭންކުގެ އެހީގައި މިނިސްޓްރީ އޮފް ހަޔަރ އެޑިއުކޭޝަނާއި، މިނިސްޓްރީ އޮފް އިކޮނޮމިކް ޑިވެލޮޕްމަންޓް ގުޅިގެން ހިންގާ ޕްރޮޖެކްޓެކެވެ.

"ޕިޗްއަޕް" ފަރުމާކޮށްފައިވަނީ އައު ވިޔަފާރިއެއް ތަރައްޤީ ކުރާނެގޮތުގެ ޚިޔާލެއް ހުށަހަޅައިގެން، ފައިސާގެ އެހީއާއި، ތަމްރީނު އަދި ވިޔަފާރި ކުރިއެރުވުމަށް ބޭނުންވާ އެހެނިހެން އެހީތެރިކަން ފޯރުކޮށްދޭގޮތަށެވެ.

މި މުބާރާތުގެ ތެރެއިން 23 އައު ވިޔަފާރިއަކަށް ޖުމްލަ 12.4 މިލިއަން ރުފިޔާ ހިލޭ އެހީގެ ގޮތުގައި ވަނީ އެވޯޑްކޮށްފައެވެ. މި 23 އައު ވިޔަފާރީގެ ތެރޭގައި ފަތުރުވެރިކަމުގެ ދާއިރާއިން 6 ވިޔަފާރިއަކާއި، ފަތުރުވެރިކަމާއި ގުޅުންހުރި ޢުމްރާނީ މަސައްކަތުގެ ދާއިރާއިން އެއް ވިޔަފާރިއެއް ހިމެނެއެވެ. އަދި އިންފޮމޭޝަން، ކޮމިއުނިކޭޝަން އެންޑް ޓެކްނޮލޮޖީގެ ދާއިރާއިން 5 ވިޔަފާރިއަކާއި، ދަނޑުވެރިކަމުގެ ދާއިރާއިން 11 ވިޔަފާރިއެއް ހިމެނެއެވެ.

މި ހަފްލާގައި ވާހަކަދައްކަވަމުން ހަޔަރ އެޑިއުކޭޝަން މިނިސްޓްރީގެ ސްޓޭޓް މިނިސްޓަރ މުޙައްމަދު ހާޝިމް ވިދާޅުވީ، މިއީ ޒުވާނުން ބާރުވެރިކުރުވާ، ޒުވާނުންނަށް އެކި ދާއިރާތަކުން ކުރިއަށްދިއުމަށް ހުޅުވިގެންދިޔަ ފުރުޞަތެކެވެ. ޕިޗްއަޕްގެ ތެރެއިން އެންމެ ބޮޑު ތަރުޙީބެއް ލިބިގެންދިޔައީ ދަނޑުވެރިކަމުގެ ދާއިރާއަށްކަން ފާހަގަކުރައްވާ، މިއީ އެ ސިނާޢަތް ކުރިއެރުމަށް އެޅިގެންދިޔަ ހެޔޮ ފާލެއްކަމަށް އޭނާ ވިދާޅުވިއެވެ.

ވޯލްޑް ބޭންކުގެ އެހީގައި 5 އަހަރު ދުވަހުގެ މުއްދަތަކަށް ކުރިއަށްގެންދިޔާ މި ޕްރޮޖެކްޓަށް 20 މިލިއަން ޑޮލަރުގެ އެހީ ވޯލްޑް ބޭންކުން ފޯރުކޮށްދީފައިވެއެވެ. މި ޕްރޮޖެކްޓުގެ މައިގަނޑު މަޤްޞަދަކީ ދިވެހި ޒުވާނުންނަށް ޚާއްސަ އަހަމިއްޔަތުކަމެއްދީގެން ޓެކްނިކަލް އަދި ވޮކޭޝަނަލް ސްކިލްސް ފުޅާކޮށް، ވިޔަފާރީއާއި ވިޔަފާރިވެރިކަމުގެ ހުނަރުތައް ތަރައްޤީކޮށް ޒުވާނުންނަށް ވިޔަފާރިއާއި އާމްދަނީގެ މަގުތައް އަލިކޮށްދިނުމެވެ.