42 ޤައިދީންނާއެކު މޯލްޑިވްސް ކަރެކްޝަނަލް ސަރވިސް (އެމްސީއެސް) އިން ރިހެބިލިޓޭޝަން ފްރޭމްވަރކްގެ ދެވަނަ ފޭސް ގެ އައު ދެ ބެޗް މާފުށީ ޖަލުގައި މިއަދު ފަށައިފިއެވެ.

3 މަސް ދުވަހަށް ކުރިޔަށްދާ ރިހެބިލިޓޭޝަން ފްރޭމްވަރކް ފޭސް ދޭއްގައި މިއަދު ފަށާފައިވަނީ ފިރިހެން ޤައިދީންގެ 16 ވަނަ ބެޗާއި އަންހެން ޤައިދީންގެ 4 ވަނަ ބެޗެވެ. މިގޮތުން 16 ވަނަ ބެޗްގައި 30 ފިރިހެން ޤައިދީން ބައިވެރިވެފައިވާއިރު، ބެޗް 4 ގައި 12 އަންހެން ޤައިދީން ވަނީ ބައިވެރިވެފައެވެ.

މޯލްޑިވްސް ކަރެކްޝަނަލް ސަރވިސުން ރިހެބިލިޓޭޝަން ފްރޭމްވަރކް ތަޢާރަފްކުރުމުގެ މަޤްޞަދަކީ ޤައިދީން އިސްލާހުކޮށް، އެމީހުންނަށް ތައުލީމާއި ހުނަރު އުނގަންނައިދީ، މުޖްތަމަޢަށް ނުކުންނައިރު އެފަރާތްތަކަށް އާމްދަނީއެއް ލިބޭނޭފަދަ މަސައްކަތެއްކޮށްގެން ކުށުގެ ވެށިން ދުރުހެލިވެ އުޅުމަށް މަގުފަހިކޮށްދިނުމެވެ.

މީގެ އިތުރުން ޤައިދީންނަކީ ނަފްސާނީ ގޮތުން ދުޅަހެޔޮ ބައެއް ކަމުގައި ހަދައި، އެމީހުން ކުށުގެ ވެށިން ސަލާމަތްކޮށް، އަމިއްލަ ނަފްސަށް އިތުބާރުކުރާ ފަރުދުންތަކެއްގެ ގޮތުގައި މުޖްތަމަޢުއަށް ނެރެދިންވެސް މި ފްރޭމްވަރކް ގެ މަޤްސަދުތަކުގެ ތެރޭގައި ހިމެނެއެވެ.

މި ޕްރޮގްރާމްގައި ހިމެނޭ ސައިކޮލޮޖީ ޕްރޮގްރާމްތަކުގެ ތެރޭގައި ކުށުގެ ވެށިން ދުރުހެލިވުމަށް ބާރުއަޅާ ޕްރޮގްރާމްތަކާއި ދީނީ ޕްރޮގްރާމްތަކާއި ދިރިއުޅުމުގެ ހުނަރުތައް ދަސްކޮށްދޭ ޕްރޮގްރާމްތައް ހިމެނެއެވެ.