ރާއްޖޭން ބޭރުގެ އެކި ސަރަހައްދުތަކުގައި ކުރިއަށްދާ ހަނގުރާމަތަކުގައި ބައިވެރިވާ ދިވެހިންނަށް ލިބޭ ކުދިން ރަޖިސްޓްރީކުރުމާބެހޭ އުސޫލެއް އެކުލަވާލައިފިއެވެ.

ޑިޕާޓްމެންޓް އޮފް ނޭޝަނަލް ރަޖިސްޓްރޭޝަން, ޑީއެންއާރުން އެކުލަވާލާފައިވާ މިއުސޫލުގައިވާ ގޮތުން ހަނގުރާމަވެރި ސަރަހައްދެއްގައި ދިވެހި ރައްޔިތަކަށް އުފަންވެފައިވާ ކުދިންގެ އުފަންވުން، ކަމާބެހޭ ގާނޫނުތަކުގައިވާ ގޮތުގެ މަތިން ރާއްޖޭގައި ރަޖިސްޓްރީ ކުރުން ލާޒިމްވެއެވެ.

އުސޫލުގައިވާ ގޮތުން ކުއްޖެއްގެ އުފަންވުން ރަޖިސްޓްރީ ކޮށްދެވޭނީ އެ ކުއްޖަކީ ދިވެހި ރައްޔިތަކަށް އުފަން ދަރިއަކު ކަމާމެދު ގޮތެއް ކަނޑައެޅުމަށްޓަކައި، ގާނޫނުގެ ދަށުން ކޯޓަށް މައްސަލަ ހުށަހަޅައި، އެ ކުއްޖެއްގެ އުފަންވުމާމެދު ކޯޓުން ގޮތެއް ކަނޑައެޅުމުންނެވެ.

އަދި ކޯޓުން ގޮތެއް ނިންމާތާ ހަތަރު ދުވަހުގެ ތެރޭގައި އެ ކުއްޖެއްގެ އުފަންވުން ރަޖިސްޓާ ކުރުމަށާއި އުފަންދުވަހުގެ ސެޓުފިކެޓު ހެދުމަށް ފޯމު މެދުވެރިކޮށް އެ ކުއްޖެއްގެ މަންމަ ނުވަތަ ބައްޕަ ރަށްވެހިވެފައިވާ ރަށެއްގެ ނުވަތަ ސިޓީއެއްގެ ކައުންސިލަށް ހުށަހަޅަންވާނެ ކަމަށް އެ އުސޫލުގައި ބަޔާންކޮށްފައިވެއެވެ.

ރާއްޖޭން ބޭރުގެ އެކި ސަރަހައްދުތަކުގައި ކުރިއަށްދާ ހަނގުރާމަތަކުގައި ބައިވެރިވާ ދިވެހިންނަށް ލިބޭ ކުދިން ރަޖިސްޓްރީކުރުމާބެހޭ އުސޫލެއް އެކުލަވާލާފައިވާއިރު، އެފަދަ ހަނގުރާމަތަކުގައި އުޅެފައި ރާއްޖެ އަންނަ މީހުން ރީހެބިލިޓޭޓްކުރުމާއި ބެހޭ އުސޫލެއްވެސް ސަރުކާރުން މިހާރު ވަނީ އެކުލަވާލާފައެވެ.