ސޫރިޔާގެ ދާހިލީ ހަނގުރާމައިގެ ތެރެއިން، އެ ގައުމުގެ ހަނގުރާމަވެރި ސަރަހައްދެއްގައި އުފަންވި ދެ ކުއްޖެއްގެ މަންމައަކީ ދިވެއްސެއްކަމަށް ފެމިލީ ކޯޓުން ހުކުމްކޮށްފިއެވެ.

ރައްޔިތުންގެ މަޖިލީހުން 29 ނޮވެމްބަރު 2021 ގައި ފާސްކުރި ޓެރަރިޒަމްގެ ގާނޫނަށް އިސްލާހު ގެނައުމުގެ ޤާނޫނުގައިވާ ގޮތުން، ހަނގުރާމަވެރި ސަރަހައްދުތަކުގައި އުޅެނިކޮށް ދިވެހިންނަށް ލިބޭ ދަރިންނަކީ އެ މީހުންގެ ދަރިންކަން ސާބިތުކުރަން ކޯޓަށް ހުށަހަޅަން ޖެހޭނެއެވެ.

މިއީ މިފަދަ މައްސަލައެއް ފެމިލީ ކޯޓަށް ހުށަހަޅައިގެން ގޮތެއް ނިންމި ފުރަތަމަ ފަހަރެވެ.

މިމައްސަލަ ކޯޓަށް ހުށަހަޅާފައިވަނީ ސީރިއާގެ ހަނގުރާމަވެރި ސަަރަހައްދެއްގައި އުޅުނު ދިވެހި އަންހެނެކެވެ. ޓެރަރިޒަމްގެ ޤާނޫނުގެ ދަށުން މިމަހުގެ 4 ވަނަ ދުވަހު އޭނާ ފެމިލީ ކޯޓަށް ހުށަހެޅީ، ހަނގުރާމަވެރި ސަރަހައްދެއްގައި 2015 އަދި 2017 ގައި އުފަންވި ދެ އަންހެން ކުދިންނަކީ ދިވެހި ރައްޔިތަކަށް އުފަންވެފައިވާ ދަރިންކަން ސާބިތު ކުރުމަށެވެ.

ފެމިލީ ކޯޓުން އެ ކުދިންނަކީ އެ އަންހެން މީހާގެ ދަރިންކަން ސާބިތުވާ ކަމަށް ހުކުމްކުރީ ޑީއެންއޭ އަޅާކިޔުމަށްފަހު ދިވެހި ފުލުހުން ހަދާފައިވާ މެޓާނިޓީ ޑީއެންއޭ ތަހުލީލު ރިޕޯޓަށާއި އެ ރިޕޯޓް ހެދިމީހާގެ ހެކިބަހުގެ އިތުރުން އެހެން ހެކިތަކަށް ރިއާޔަތްކުރުމަށްފަހު އެވެ.

ޤާނޫނު ބުނާގޮތުން ކޯޓަށް މިފަދަ މައްސަލައެއް ހުށަހަޅާތާ 14 ދުވަހުގެ ތެރޭގައި ނިންމަން ޖެހޭނެ އެވެ. އަދި ކޯޓުން ގޮތްކަނޑައަޅާތާ ހަތަރު ދުވަހުގެ ތެރޭގައި ކުދިންގެ އުފަންވުން ރަޖިސްޓްރީކޮށް، އުފަންދުވަހުގެ ސެޓްފިކެޓް ހެއްދުމަށް ހުށަހަޅަން ޖެހެއެވެ.

ރާއްޖެއިން ބޭރުގެ އެކި ސަރަހައްދުތަކުގައި ހިނގާ ދާހިލީ ހަނގުރާމަތަކުގައި ދިވެހިން ބައިވެރިވަމުންދާއިރު، ބައެއް މީހުން އެނބުރި ރާއްޖެ އަންނަމުންވެސް ދެއެވެ. އަދި މިފަދަ ފަރާތްތަކާއިމެދު އަމަލުކުރުމަށް ހާއްސަ އުސޫލުތައް ދަނީ އެކުލަވާލަމުންނެވެ.

އެގޮތުން ހަނގުރާމަވެރި ސަރަހައްދުތަކުގައި އުފަންވާ ކުދިން ރާއްޖޭގައި ރަޖިސްޓްރީކޮށްދިނުމާ ބެހޭ އުސޫލުވެސް ޑިޕާޓްމަންޓް އޮފް ނެޝަނަލް ރެޖިސްޓްރޭޝަނުން މިހާރު ވަނީ ގެޒެޓްކޮށްފައެވެ.