ގއ. ދާންދޫގައި ފުލުހުން ހިންގަން އުޅުނު މަސްތުވާތަކެތީގެ އޮޕަރޭޝަނެއްގެ މައުލޫމާތު ލީކުކުރިކަމުގެ ތުހުމަތު ކުރެވުނު ދާންދޫ ކައުންސިލްގެ ރައީސް މުހައްމަދު އާސިފްގެ މައްޗަށް ދަޢުވާކުރެވޭވަރަށް ހެކި ނެތުމުގެ ސަބަބުން އެ މައްސަލަ ފައިލްކޮށްފިއެވެ.

އާސިފްގެ ވަކީލު ކުރީގެ ޕްރޮސިކިއުޓަރ ޖެނެރަލް މުހުތާޒް މުހުސިން މިއަދު ވަނީ ފުލުހުން މި މައްސަލަ ނިންމި ގޮތުގެ މަޢުލޫމާތު ޢާންމު ކުރަށްވާފައެވެ. މައްސަލަ ނިންމި ލިޔުމުގައިވާ ގޮތުން އާސިފްގެ މައްޗަށް ތުހުމަތު ކުރެވުނު މައްސަލައިގައި ދައުވާކުރެވޭވަރަށް ހެކި ޤަރީނާ ލިބިފައިނުވާތީ މައްސަލަ ވަނީ ފައިލް ކޮށްފައެވެ. މިމައްސަލަ ފުލުހުން ތަހުޤީޤުކޮށްފައިވަނީ ސަރުކާރުގެ ސިއްރު ބޭޒާރުކުރި ކަމަށް ބުނެއެވެ.

އެކަމާ ގުޅިގެން މުހުތާޒް ވިދާޅުވީ ދާންދޫ ދާއިރާގެ ސިޔާސީ ބާރުގަދަ ފަރާތެއްގެ ނުފޫޒު ފޯރުވުމާ އެކު ދާންދޫ ރައީސްގެ މައްޗަށް ކުރެވުނީ އަސާސެއްނެތް ތުހުމަތެއް ކަމުގައި އޭރުވެސް އާސިފް ވިދާޅުވި ކަމަށެވެ. އަދި ރައްޔިތުން އިންތިޚާބު ކުރަށްވާފައި ތިއްބަވާ ފަރާތްތަކާއި ދޭތެރޭ މިގޮތަށް ކަންކަންކުރުން ބަލައިގަންނަން ދަތި ކަމަށް މުހުތާޒް ވިދާޅުވިއެވެ.

ދާންދޫ ދާއިރާގެ ސިޔާސީ ބާރުގަދަ ފަރާތެއްގެ ނުފޫޒު ފޯރުވުމަައި އެކު ދާންދޫ ރައީސްގެ މައްޗަށް ކުރެވުނީ އަސާސެއްނެތް ތުހުމަތެއް ކަމުގައި އޭރުވެސް އާސިފް ވިދާޅުވި. ރައްޔިތުން އިންތިޚާބު ކުރައްވާފައި ތިއްބަވާ ފަރާތްތަކާއި ދޭތެރޭ މިގޮތަށް ކަންކަންކުރުން ބަލައިގަންނަން ދަތި. https://t.co/AElPzjEyBO pic.twitter.com/iGr2rhNz2F

— Muhuthaz Muhusin🇲🇻🇵🇸 (@Muhuthaz) January 25, 2022

މި މައްސަލައިގައި އާސިފްގެ ފޯނު މިދިޔަ އަހަރުގެ އޮގަސްޓްމަހުގެ 10 ވަނަ ދުވަހު ފުލުހުންގެ ބެލުމުގެ ދަށަށް ގެންދިޔަ ނަމަވެސް ފޯނުން އެ ތުހުމަތުތަކަށް ބާރުދޭ ހެތްކެއް ފެނިފައެއް ނުވެއެވެ. އެ މައްސަލައިގައި އޭނާ ހިމެނޭހެން ހަތަރު މީހެއްގެ ފޯނު ހިފެހެއްޓި އެވެ.

މި މައްސަލައާ ގުޅިގެން އޭނާގެ ފޯނު ފުލުހުންގެ ބެލުމުގެދަށަށް ގެންދިޔައީ ޑްރަގް އޮޕަރޭޝަނާގުޅޭ ވާހަކަތަކެއް މެސެންޖަރ އެޕްލިކޭޝަން މެދުވެރިކޮށް ދައްކަވާފައިވާކަމަށް ފުލުހުންގެ އިންޓެލިޖެންސްއަށް ލިބުނު މައުލޫމާތަކާ ގުޅިގެން ކަމަށް ފުލުހުން އޭރުވަނީ ބުނެފައެވެ.