ގެވެށި އަނިޔާގެ މައްސަލައެއްގައި އިއްޔެ ފުލުހުންގެ ބެލުމުގެ ދަށަށް ގެންދިޔަ ފިރިހެންމީހާގެ ބަންދަށް 15 ދުވަސް ކްރިމިނަލް ކޯޓުން ޖަހައިފިއެވެ.

ފުލުހުންގެ އިދާރާއިން އިއްޔެ ބުނީ، މާލޭގެ ގެއެއްގައި ބިދޭސީ އަންހެނަކަށް އޭނާގެ ފިރިމީހާ ގެވެށި އަނިޔާކުރި މައްސަލައެއް އިއްޔެ ހެނދުނު އެ އިދާރާއަށް ހުށައަޅާފައިވާ ކަމަށެވެ. އެ ޙާދިސާގައި އަނިޔާ ލިބުނު އަންހެން މީހާގެ ފައިގެ ދެ ތަނަކަށް ތޫނު އެއްޗެއް ބޭނުންކޮށްގެން ޙަމަލާ ދީފައިވާއިރު ކުށުގެ ވެށީގައި ދެވަޅި އޮތްކަމަށް ފުލުހުން ބުނެއެވެ.

އެތަނުން އެއްވަޅީގައި ތިލަނެތްކަމަށާއި އަންހެން މީހާ ހޮސްޕިޓަލަށް ގެންގޮސް އެކްސްރޭ ނެގުމުން އެއްވަޅީގެ ތިލަ އޮތީ އަންހެންމީހާގެ ފައިގެ ފަލަމަސްގަނޑުގެ ތެރޭގައިކަމަށް ފުލުހުން ވަނީ ކޯޓުގައި ބުނެފައެވެ. ފުލުހުން ކުށުގެ ވެއްޓަށް ޙާޟިރުވުމުން މި ޙާދިސާގައި ހައްޔަރުކުރި ޢުމުރުން 27 އަހަރުގެ އިންޑިއާ ފިރިހެންމީހާ ވަނީ އޭނާގެ އަތުގައި އޮތް ވަޅި އަމިއްލަ ބަނޑަށް ހަރާލާފައެވެ.

ކޯޓުގައި ފިރިހެންމީހާ ބުނެފައިވަނީ އަނބިމީހާގެ ގަޔަށް ވަޅިހެރުނީ ދެމަފިރިންކުރި ޒުވާބެއްގެތެރެއިން ކަމަށާއި އޭނާގެ އަތުގައި އޮތް ވަޅި އަމިއްލަ ބަނޑަށް ހެރީ ފުލުހުން ފެނުމުން ބިރުން ކަމަށެވެ.

އެމައްސަލާގައި ކޯޓުން ނިންމަވާފައި ވަނީ މުޖުތަމަޢުގެ ސަލާމަތަށް ނުރައްކަލެއް ކުރިމަތިވެދާނެ ކަމަށްޓަކައި ފިރިހެން މީހާ ކަސްޓޯޑިއަލް ޖަލެއްގައި 15 ދުވަހަށް ބަންދުކުރުމަށެވެ.