މާލޭ ޖަލުގައި ޤައިދީންނާއި ބަންދުމީހުންނަށް އޮންލައިންކޮށް ޝަރީޢަތްތަކުގައި ބައިވެރިވެވޭގޮތަށް ޚާއްސަކޮށްފައިވާ 03 ކޯޓް ރޫމް މިއަދު ބޭނުންކުރަން ފަށައިފިއެވެ.

މާލޭ ޖަލުގައި މިކަށްޓަކައި މިއަދު ބޭއްވި ރަސްމިއްޔާތުގައި، ކޯޓް ރޫމްތައް ހުޅުއްވައިދެއްވީ ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅެވެ.

މި ރަސްމިއްޔާތުގައި ކޮމިޝަނަރ އޮފް ޕްރިޒަންސް އަޙްމަދު މުޙައްމަދުފުޅު ދެއްކެވި ވާހަކަފުޅުގައި ވިދާޅުވީ މާލޭ ޖަލުގައި މިއަދު ބޭނުންކުރަން ފެށި 03 ކޯޓް ރޫމަކީ ކޯވިޑް-19ގެ ބަލިމަޑުކަމުގެ ސަބަބުން ގިނަ މަސައްކަތްތަކެއް އޮންލައިންކުރަން މަޖްބޫރުކުރަންޖެހިފައިވާ ވުމާއެކު މަސައްކަތަށް ލިބިގެންދިޔަ ވަރަށްބޮޑު ކުރިއެރުމަކާއި ލުއިފަސޭހައެއް ކަމަށެވެ.

އެގޮތުން ކަރެކްޝަންސްގެ ބެލުމުގެ ދަށުގައި އަބަދުވެސް ޝަރީޢަތް ނިމެންދެން ގިނަ އަދަދެއްގެ މީހުން ބަންދުކޮށްފައި ބައިތިއްބަންޖެހޭ ކަމަށާއި މިއަދުވެސް 298 މީހުން ބަންދުގައި ތިބިކަމަށް ކޮމިޝަނަރ ފާހަގަކުރެއްވިއެވެ. ހަމައެއާއެކު އެއްތަނުން އަނެއްތަނަށް މީހުން އުފުލުމަކީ ތަކުލީފާއި ޚަރަދު ބޮޑު ކަމެއްކަމަށާއި މި ކޯޓް ރޫމްތަކުގެ ސަބަބުން މަސައްކަތަށް ވަރަށް ބޮޑެތި ލުއިތަކެއް ލިބިގެންދާނެ ކަމަށް ކޮމިޝަނަރ ވިދާޅުވިއެވެ.

މި ރަސްމިއްޔާތުގައި މާލޭ ޖަލުގެ ޑައިރެކްޓަރ ޑީއެސްޕީ އަލްއުސްތާޛް މުޙައްމަދު ތޮލާލް ވިދާޅުވީ މީގެ ކުރިން އޮންލައިންކޮށް ޝަރީޢަތުގައި ބައިވެރިވުމަށް ވަކިން ތަނެއް ޚާއްސަކުރެވިފައި ނުވާކަމަށާއި މިވަތުގުވެސް ޝަރީޢަތުން ވަކި ގޮތެއް ނިމެންދެން މާލޭ ޖަލުގައި 131 މީހުން ބަންދު ކޮށްފައިވާ ކަމަށެވެ.