ކޮމިޝަނަރ އޮފް ޕޮލިސް މުހައްމަދު ހަމީދު މާދަމާ ޕޮލިސް ބޯޑަށް ޙާޟިރުކުރަން ނިންމައިފިއެވެ.

މަސްތުވާތަކެތީގެ ބޮޑު އޮޕަރޭޝަނެއް ކުރިއަށް ގެންދިއުމުގައި އިޖުރާޢަތްތަކާ ފުލުހުން ޚިލާފުވެފައިވާތީ އެ މައްސަލާގައި ސުވާލުކުރުމަށް ސީޕީ ޙަމީދު ޕޮލިސް ބޯޑަށް ޙާޟިރުކުރުމަށް ހަމަޖެހިފައިވަނީ މާދަމާ މެންދުރު 2:00 އަށެވެ.

މިއީ ޕޮލިސްބޯޑަށް ކޮމިޝަނަރ އޮފް ޕޮލިސްގެ މަޤާމުގައި ހުންނެވި ބޭފުޅަކު ޙާޟިރުކުރާ ފުރަތަމަ ފަހަރެވެ. ފުލުހުންގެ ޚިދުމަތުގެ ޤާނޫނުގެ ދަށުން ފުލުހުންގެ ލީޑަޝިޕްގައި ތިއްބެވި ފަރާތްތަކުގެ ގާބިލްކަން ކަށަވަރުކުރުމުގެ ޒިންމާ މަތިކޮށްފައިވަނީ ފޮލިސް ބޯޑަށެވެ.

ދިވެހި ފުލުހުންގެ ޚިދުމަތުގެ ޤާނޫނުގެ 75 ވަނަ މާއްދާގެ (ހ) ގައިވާ ގޮތުގެމަތިން، އެކުލަވާލާފައިވާ ޕޮލިސް ބޯޑް އެކުލެވިގެންވަނީ 7 މެމްބަރުންގެ މައްޗަށެވެ. މިބޯޑަކީ ރައީސުލްޖުމްހޫރިއްޔާ އައްޔަން ކުރައްވަން ޖެހޭ ބޯޑެއްގެ ގޮތުގައި ގާނޫނުގައި އޮތްއިރު ބޯޑުގައި ހިމެނެނީ ރައީސުލްޖުމްހޫރިއްޔާ އައްޔަނުކުރާ 2 މެމްބަރުންނާއި ފަންނީ ދާއިރާއަކުން ތައުލީމާއި ތަޖުރިބާ ލިބިފައިވާ 3 މީހުންގެ އިތުރުން އާންމު ރައްޔިތުންގެ ތެރެއިން ކުރިމަތިލާ 2 މީހުންނެވެ.

ބޯޑުގައި ހިމެނިވަޑައިގަންނަވަނީ މ.ހަޒާރީވިލާ އަޙްމަދު ފަޔާޟް ޙަސަނާއި، ހ.ނޫމުތީ ޢާއިޝަތު ނޫރާ މުޙައްމަދާއި، މއ.މަނާގެ، ޢަލީ ފާއިޒާއި، މއ.ގޯލްޑަންމޫން އަޙްމަދު ނާޝިދާއި، ގ.ޑިމްލައިޓް އާދަމް އިބްރާހީމާއި، ހ.ޝޭޑީކޯނާ ޙާމިދު ޢަބްދުލްޣަފޫރާއި ސ.ހުޅުދޫ/ ދެތަޑިމާގެ އަލްއުސްތާޛާ ޞަފާ ޝަރީފެވެ.