ށ. ފޭދޫ ޕްރީ ސްކޫލް ބޭރުފާރުގައި "އިންޑިއާ އައުޓް" ޖެހުމުން ދެ ޒުވާނަކު ހައްޔަރު ކޮށްފައިވާ ކަމަށް ފުލުހުން ހާމަކޮށްފިއެވެ.

މީޑިޔާތަކަށް މަޢުލޫމާތުދެމުން ފުލުހުން މިއަދު ބުނީ ށ. ފޭދޫ ޕްރީ ސްކޫލްގެ ފާރެއްގައި ތަކުރާރުކޮށް އިންޑިއާ އައުޓް ލިޔުނު މައްސަލައިގައި ކޯޓު އަމުރެއްގެ ދަށުން، ދެ މީހަކު ހައްޔަރު ކޮށްފައިވާ ކަމަށެވެ. މި ދެމީހުންވެސް ހައްޔަރު ކުރީ މިދިޔަ މަހުގެ 27 ވަަނަ ދުވަހުއެވެ.

މި މައްސަލައިގައި ހައްޔަރު ކުރީ އުމުރުން 31 އަހަރުގެ ފިރިހެނަކާއި އުމުރުން 28 އަހަރުގެ ފިރިހެނެކެވެ. މި ދެމީހުންގެ ބަންދަށް ކޯޓުން ވަނީ 7 ދުވަސް ޖަހައިފައެވެ.

އިދިކޮޅު ފަރާތްތަކުން ކުރިޔަށްގެންދާ "އިންޑިއާ އައުޓް" ކެމްޕޭނުގައި ށ. ފުނަދޫއަށް ވަޑައިގެން ބޭއްވެވި "އިންޑިއާ އައުޓް" ހަރަކާތުގައި ރައީސް ޔާމީން ވަނީ ގޭގޭގެ ފާރުތަކުގައި އިންޑިޔާ އައުޓް ލިޔުމަށް ގޮވާލައްވާފައެވެ. އޭގެ ފަހުން ށ. ފުނަދޫ ސްކޫލް ފާރުގައި "ސޭ ނޯ ޓު އިންޑިއަން" ވަނީ ލިޔެފައެވެ. ނަމަވެސް އެކަމާ ގުޅިގެން ފުލުހުން މީހަކު ހައްޔަރުކުރިކަން ހާމަކޮށްފައެއް ނުވެއެވެ.

އިދިކޮޅުން ކުރިއަށް ގެންދާ އިންޑިއާ އައުޓް ހަރަކާތް ރަށްރަށުގައި ފުޅާކުރުމުގެ ގޮތުން، ރައީސް ޔާމީން ވަނީ އަތޮޅުތެރޭގެ ރަށްރަށަށް ވަޑައިގެން އެ ހަރަކާތްތަކުގައި ބައިވެރިވެ ވަޑައިގެންފައެވެ. ހަމަ އެއާއެކު މާލޭގައިވެސް ސިލްސިލާކޮށް އިހުތިޖާޖުތައް ބާއްވައި، އިދިކޮޅުން ދަނީ އިންޑިއާ ސިފައިން މިގައުމުން ބޭރު ކުރުމަށް ގޮވާލަމުންނެވެ.