ރާއްޖެ ހިމެނޭ ގޮތުން ޕްލާސްޓިކާ ދެކޮޅަށް މަސައްކަތް ކުރުމަށް ބައިނަލްއަގުވާމީ މުއާހަދާއެއް އެކުލަވާލުމަށް ފާސްކޮށްފިއެވެ.

ކެންޔާގެ ވެރިރަށް ނައިރޯބީގައި މިހާރު ކުރިއަށްދާ ޔުނައިޓެޑް ނޭޝަންސް އެންވަޔަރަމަންޓް އެސެމްބްލީގެ 5 ވަނަ ސެޝަންގައި ޕްލާސްޓިކުގެ ޒަރީއާއިން ތިމާވެއްޓަށް ލިބޭ ގެއްލުންތަކުން އަރައިގަތުމަށް ގާނޫނީ ބާރު ލިބިދޭ މުއާހަދާއެއްގެ ބޭނުންތެރިކަން ފާހަގަކޮށް ރެޒޮލިއުޝަނެއް ހުށަހަޅާފައިވެއެވެ. މި ރެޒޮލިއުޝަނަށް ރާއްޖެއިން ވަނީ، ފުރިހަމައަށް ތާއީދުކޮށްފައެވެ. ޤާނޫނީގޮތުން ބާރު ލިބިދޭ މިފަދަ މުއާހަދާއެއް އެކުލަވާލުމުގައި އެއްބަސްވާ 81 މެންބަރު ގައުމުގެ ތެރޭގައި ރާއްޖެ ހިމެނެއެވެ. މި ބައްދަލުވުމުގައި ދުނިޔޭގެ 193 މެންބަރު ގައުމުން ބައިވެރިވެއެވެ.

ތިމާވެއްޓާބެހޭ ވުޒާރާއިން ބުނީ އެއްފަހަރު ބޭނުންކޮށްފައި އުކާލާ ޕްލާސްޓިކުގެ ސަބަބުން ދުނިޔޭގައި ކުރިމަތިވަމުންދާ ތިމާވެށީގެ މައްސަލަތަކަށް ބައިނަލްއަގުވާމީ ފެންވަރުގައި އެއްބަސްވުމެއް އޮތުމުގެ ބޭނުންތެރިކަމާމެދު ގިނަ ގައުމުތަކުން އެއްބަސްވާ ކަމަށެވެ. އަދި ރާއްޖެއިން އިސްނަގައިގެން ގައުމީ ފެންވަރުގައި ތަންފީޒު ކުރަމުންދާ ސިންގަލްޔޫސް ޕްލާސްޓިކު ފޭސްއައުޓް ޕްލޭންގެ މައުލޫމާތު ވަނީ މި ބައްދަލުވުމުގެ މެންބަރު ގައުމުތަކުގެ އިސްވެރިންނާ ހިއްސާކޮށްފައެވެ.

އ.ދގެ އެންވަޔަރަމަންޓް އެސެމްބްލީގެ 5 ވަނަ ސެޝަންގައި, ޕްލާސްޓިކާ ދެކޮޅަށް މަސައްކަތް ކުރުމަށް އެކުލަވާލުމަށް އެއްބަސްވެވުނު މި ބައިނަލްއަގުވާމީ މުއާހަދާގައި, ޕްލާސްޓިކު އުފެއްދުމާއި، ބޭނުންކުރުމާއި، މިތަކެތި ކުނީގެ ގޮތުގައި ނެތި ފަނާވެގެން ދިއުމާ ހަމައަށް އެކި މަރުހަލާތަކުގައި ތިމާވެއްޓަށް ލިބެމުންދާ ގެއްލުންތައް ކުޑަ ކުރުމަށް އަލިއަޅުވާލާނެއެވެ.

މީގެއިތުރުން ބައިނަލްއަގުވާމީ ފެންވަރުގައި ވަށާޖެހޭ އިގުތިސާދު ކުރިއަރުވައި, ޕްލާސްޓިކު ބޭނުން ކުރާ މިންވަރު މަދުކޮށް، އެއްފަހަރު ބޭނުންކުރާ ޕްލާސްޓިކު އަލުން ބޭނުންކުރާ، މިފަދަ މުއާހަދާއެއް އޮތުމަކީ ރާއްޖެފަދަ ކުރިއަރަމުން އަންނަ ގައުމުތަކަށް ޕްލާސްޓިކުގެ ސަބަބުން ލިބޭ ގެއްލުންތަކަށް ހައްލު ހޯދުމަށް ބައިނަލްއަގުވާމީ ފެންވަރުގައި މަސައްކަތްކުރުމަށް އެޅިގެންދާނެ ވަރުގަދަ ފިޔަވަޅެކެވެ.

ޔުނައިޓެޑް ނޭޝަންސް އެންވަޔަރަމަންޓް އެސެމްބްލީގެ 5 ވަނަ ސެޝަނަށް ތިމާވެށީގެ އެކި މައްސަލަތައް ހައްލުކުރުމަށް ޖުމްލަ 17 ރެޒޮލިއުޝަން ހުށަހަޅާފައިވެއެވެ. މިއީ، ދުނިޔޭގެ ތިމާވެށީގެ ކަންކަމާގުޅޭ ގޮތުން ބާއްވާ އެންމެ ބޮޑު ބައްދަލުވުމެވެ. އަދި މި އެސެމްބްލީއަކީ، "ދެމެހެއްޓެނިވި ތަރައްގީ 2030"ގެ ލަނޑުދަނޑިތަކުގެ ތެރޭގައި ހިމެނޭ ތިމާވެެއްޓާ ގުޅޭ ކަންކަން ހާސިލްކުރުމަށް ކުރެވެމުންދާ މަސައްކަތްތައް މުތާލިއާކުރުމަށް މަގުފަހިކޮށްދޭ ޕްލެޓްފޯމެކެވެ.