ރައްޔިތުންގެ މަޖިލީހުގައި ދައުލަތުގެ ވަޒީރަކު އިތުރުފުޅު ހައްދަވާފައިވާކަމަށް ބުނެ، އެމައްސަލަ ބެލުމަށް އިދިކޮޅު ފަރާތްތަކުން މަޖިލީހަށް ހުށަހަޅައިފިއެވެ.

މިމައްސަލަ މަޖިލީހަށް ހުށަހަޅުއްވާފައިވަނީ މަޑުއްވަރީ ދާއިރާގެ މެންބަރު އާދަމް ޝަރީފް އުމަރެވެ.

އޭނާ މައްސަލަ ހުށައެޅުއްވީ ފުލުހުންގެ ތެރޭގައި ގަސްތުގައި ގޯސް ހަދާ އޮފިސަރުން އުޅޭކަމަށް ބުނެ ބަންޑާރަ ނާއިބު އިބްރާހިމް ރިއްފަތު ދެއްކެވި ވާހަކަފުޅުތައް ހޯމް މިނިސްޓަރ އިމްރާން އަބްދުﷲ ދޮގުކުރެއްވުމުންނެވެ. އެހެންކަމުން އާދަމް ޝަރީފް ހުށަހަޅުއްވާފައިވަނީ އެ މައްސަލާގައި އިތުރުފުޅު ހައްދަވާފައިވާ ވަޒީރާމެދު ގާނޫނީ ފިޔަވަޅު އެޅުމަށެވެ.

އާދަމް ޝަރީފް ވިދާޅުވީ ކޮންމެ މީހަކީވެސް ގާނޫނުގެ ކުރިމަތީގައި ހަމަހަމަ ވާން ޖެހޭނެ މީހެއްކަމަށެވެ. އަދި ރައްޔިތުންނަށް އޮޅުވާލައިގެން ނުވާނެ ކަމަށާއި، ނަމަވެސް ވަޒީރުންގެ ފަރާތުން ފެންނަމުން ދަނީ ނާގާބިލް ކަމާއި ޒިންމާދާރުކަން ކުޑަކަންކަމަށް އާދަމް ޝަރީފް ވިދާޅުވިއެވެ.

މަޖިލީހުގެ ޖުޑިޝަރީ ކޮމިޓީގައި ވާހަކަ ދައްކަވަމުން ބަންޑާރަ ނާއިބު ވިދާޅުވެފައި ވަނީ ފުލުހުންގެ ތެރޭގައި ނިޒާމު ރަނގަޅަށް އެނގި، ނިޒާމުގެ ތެރޭގައި ހުރި ލޫޕްހޯލްތައް ހޯދައިގެން ގޯސް ހަދާ އޮފިސަރުން އުޅޭކަމަށެވެ. ނަމަވެސް ބަންޑާރަ ނައިބުގެ ތުހުމަތުތައް ދޮގުކުރައްވައި މަޖިލީހަށް ލިއުމުން ދެއްވި ޖަވާބެއްގައި ހޯމް މިނިސްޓަރ އިމްރާން ވިދާޅުވީ ފުލުހުންގެ ހިދުމަތުގައި ތިބީ ގާބިލު އަދި އިހްލާސްތެރި ފުލުހުން ކަމަށެވެ. އަދި ގަސްތުގައި ގޯސް ހަދާ ފުލުހުން ތިބޭކަމަށް ބުނުމަކީ އެންމެ ރަނގަޅު ވާހަކަތަކެއް ނޫން ކަމަށް ހޯމް މިނިސްޓަރ ވިދާޅުވިއެވެ.