މޯލްޑިވްސް ސްޕޯޓްސް އެވޯޑް ޖަލްސާގެ ސެކިއުރިޓީ ބެލެހެއްޓުމަށް މިމަހުގެ 17 ވަނަ ދުވަހު، ދުވާ ޓްރެކް ހިމެނޭ ސަރަހައްދުގެ ބައެއް މަގުތައް އާންމު ދަތުރުފަތުރަށް ބަންދުކުރުމަށް ހަމަޖެހިފައި ވާކަމަށް ދިވެހި ފުލުހުންގެ ޚިދުމަތުން ހާމަކޮށްފިއެވެ.

އެގޮތުން އާންމު ދަތުރުފަތުރާއި ހިނގާ މީހުންނަށް ބަންދުކުރުމަށް ހަމަޖެހިފައިވާ މަގުތަކަކީ ބޮޑުތަކުރުފާނުމަގު އިއްޒުއްދީންމަގާ ގުޅުނު ހިސާބުން ފެށިގެން ބޮޑުތަކުރުފާނުމަގު އާމިނާރަނި ހިނގުމާ ހަމައަށެވެ. އަދި ހިލާލީމަގު އާޒާދީ ހިނގުން ގުޅުނު ހިސާބުން ފެށިގެން ހިލާލީމަގު ބޮޑުތަކުރުފާނުމަގާ ހަމައަށްވެސް ބަންދުކުރާނެ ކަމަށް ފުލުހުން ވަނީ ބުނެފައެވެ.

އޭގެއިތުރުން މާފަތްކިލެގެފާނު ހިނގުން ބޮޑުތަކުރުފާނުމަގާ ގުޅުނު ހިސާބުން ފެށިގެން މާފަތްކިލެގެފާނު ހިނގުން އަމީނީމަގާ ހަމައަށް ބަންދު ކުރާނެ ކަމަށާއި ވައިދެރި ހިނގުން ހުދުފަޅު ހިނގުން ގުޅުނު ހިސާބުން ފެށިގެން ވައިދެރި ހިނގުން ބޮޑުތަކުރުފާނުމަގާ ހަމައަށްވެސް ބަންދު ކުރާނެ ކަމަށް ފުލުހުން ހާމަކޮށްފައިވެއެވެ.

ފުލުހުން ބުނީ މި ސަރަހައްދުތައް، މިއަދު 18:00 އިން ޖަލްސާ ނިމެންދެން އާންމު ދަތުރު ފަތުރަށާއި ފައިމަގުގައި އުޅުއްވާ ފަރާތްތަކަށް ބަންދުކުރެވޭނެ ކަމަށެވެ.

ހަމައެއާއެކު މިރޭ އޮންނަ ޖަލްސާ އަށާއި މާދަމާ ރޭ އޮންނަ މިއުޒިކް ޝޯވ އަށް ރޭގަނޑު 19:00 އިން ފެށިގެން ހަރަކާތްތައް ނިމެންދެން އެސަރަޙައްދުގެ ޕާކިންޒޯންތައްވެސް ބަންދުކުރެވޭނެ ކަމަށް ފުލުހުން ބުނެއެވެ.

މިބަދަލުތަކަށް ދުރާލައި ތައްޔާރުވެ، ބަންދުކުރެވިފައިވާ މަގުތައް ނޫން އެހެން މަގުތައް އިހުތިޔާރުކުރައްވައިގެން ދަތުރުފަތުރުގެ ކަންކަން ކުރިއަށް ގެންދެވުމަށް ފުލުހުންވަނީ އިލްތިމާސް ކޮށްފައެވެ.