ރާއްޖޭގައި އަމިއްލަ ކުންފުންޏަކުން ގިނަ އަދަދެއްގެ ރައްޔިތުންގެ މާލީ މަސްލަހަތަށް ބުރޫއަރާ ގޮތަށް ޕޮންޒީ ސްކީމަކާ އެއްގޮތްވާ ގޮތަށް މުއާމަލާތު ތަކެއް ހިންގަމުންދާ ކަމަށް ބުނެ އެ މައްސަލައިގެ ޖިނާއީ ތަހުގީގެއް ފުލުހުން ހިންގަން ފަށައިފިއެވެ.

ފުލުހުން މިރޭ އެކަން ހާމަ ކުރި ނަމަވެސް، އެއީ ކޮން ކުންފުންޏެއް ކަމެއްވެސް އަދި ސީދާ ޕޮންޒީ ސްކީމެއް ކަމުގައިވެސް ބުނެފައެއް ނުވެއެވެ. ފުލުހުން މިރޭ ނެރުނު ބަޔާނެއްގައި ބުނެފައި ވަނީ ޕޮންޒީ ސްކީމަކާ ވައްތަރު މުއާމަލާތެއް ހިންގާކަން ކަމާ ބެހޭ އިދާރާތަކުން ފުލުހުންގެ ސަމާލުކަމަށް ގެނެސްފައިވާކަމަށެވެ. އަދި އެކަމާ ގުޅިގެން ފުލުހުން ބެލިބެލުމުން، ޖިނާއީ ތަހުގީގެއް ކުރިއަށްގެންދަން ޖެހޭފަދަ ކަންތައްތަކެއް ފާހަގަ ކުރެވިފައިވާތީ މައްސަލައިގެ ޖިނާއީ ތަހުގީގެއް ދަނީ ހިންގަމުން ކަމަށް ފުލުހުން ވަނީ ބުނެފައެވެ.

ފުލުހުން ވަނީ އާންމު ރައްޔިތުން ތަފާތު މިއުޗުއަލް ފަންޑް ތަކާއި، ސްކީމްތަކުގައި އިންވެސްޓުކުރުމުގައި، މިބާވަތުގެ ކަންކަމާގުޅޭ ފަންނީ މައުލޫމާތާއި މާކެޓް ރިސްކުތަކަށް ފަރުވާތެރިވުމަށާއި އަދި ކަމާބެހޭ ގާނޫނީ އޮނިގަނޑުތަކާ އެއްގޮތަށް ރަޖިސްޓްރީކުރެވި ލައިސަންސް ނުވަތަ އެކަށީގެންވާ ހުއްދަ އޮންނަ އިތުބާރުކުރެވޭ ފަރާތްތަކުގައި ނޫނީ ފައިސާ އިންވެސްޓު ނުކުރުމަށްވެސް އިރުޝާދު ދީފައެވެ. އަދި އެހެންނޫންނަމަ މިފަދަ ކަންކަމުގެ ސަބަބުން މާލީ ގެއްލުންތަކެއް ކުރިމަތިވެދާނެ ކަމުގައިވެސް ފުލުހުން ބުނެފައިވެއެވެ.

އެއީ ކޮން ކުންފުންޏެއްކަން ފުލުހުން ހާމަ ނުކުރި ނަމަވެސް، އެއީ ކުރީގެ މަޖިލިސް މެންބަރު އަލްހާން ފަހުމީ ހިންގާ ކިންގްސް ފޮރެސްކަން ވަނީ ކަށަވަރު ވެފައެވެ. ފުލުހުން މައްސަލަ ބަލާކަމަށް ބުނެފައި ވުމުން އަލްހާން މިރޭ ވިދާޅުވެފައި ވަނީ، ޖިނާއީ އެއްވެސް ކަމެއް އަލްހާންގެ ކުންފުނި، ކިންގްސް ކެޕިޓަލް ހޯލްޑިންގްސްއިން ކޮށްފައި ނުވާނެ ކަމަށެވެ.

ފުލުހުން ބުނީ ތަހުގީގު ކުރިއަށްދާ ވަރަކުން މިކަމާގުޅޭ އިތުރު މައުލޫމާތު ހިއްސާކުރާނެ ކަމަށެވެ.