ގައުމީ ހިދުމަތުގައި އަންހެނުން ކުރާ މަސައްކަތް ފާހަގަ ކުރުމުގެ ގޮތުން ދޭ ރެހެންދި އެވޯޑް 9 ފަރާތަކަށް ސަރުކާރުން ދީފިއެވެ.

ރޭ އޮތް ރަސްމިއްޔާތުގައި 2022 ވަނަ އަހަރު އެވޯޑް ލިބުނު ފަރާތްތަކަށް ވަނީ އެވޯޑް ހަވާލުކޮށްފައެވެ. ރެހެންދި އެވޯޑް ލިބުނު ފަރާތްތަކަށް އެވޯޑް ހަވާލުކޮށްދެއްވީ ރައީސް އިބްރާހިމް މުޙައްމަދު ޞާލިޙާއި އެމަނިކުފާނުގެ އަނބިކަބަލުން ފަޒުނާ އަޙްމަދެވެ.

2022 ވަނަ އަހަރު ރެހެންދި އެވޯޑް ޙާސިލްކޮށްފައިވަނީ ނަފީސާ އަލީ އާއި، ފާތިމަތު ޖަބީން އާއި އައިޝަތު އިބްރާހީމާއި، އިއްޒަތް އަހުމަދު ނިޒާރާއި، ޑރ. ފާތިމަތު މުފްލިހާ އާއި، ލެފްޓިނެންޓް ފިރުޝާނާ ތައުފީގާއި، ދިމްނާ ފާކިރު އާއި، ޝިމްލާ އަހްމަދު ގެ އިތުރުން އެމްޕީއެލް އަށެވެ. އެމްޕީއެލަށް އެވޯޑް ދީފައިވަނީ ވަޒީފާދޭ ފަރާތްތަކާއި މުއައްސަސާތަކުގެ ދާއިރާއިންނެވެ.

ސަރުކާރުން ބުނީ ރެހެންދި އެވޯޑް ދިނުމުގެ ބޭނުމަކީ ގައުމީ ހިދުމަތަށް އަންހެނުންނަށް ބާރު އަޅާ، މުޖުތަމައަށް ފައިދާހުރި ހިދުމަތް ކުރާ އަންހެނުން ފާހަގަ ކުރުން ކަމަށެވެ. އަދި ގައުމީ ހިދުމަތުގައި މަސައްކަތް ކުރާ އަންހެނުންނަށް ހިތްވަރު ދީ އެމީހުންގެ އަގު ވަޒަންކޮށް، ޖަމާއަތަށް ފައިދާހުރި މަސައްކަތްކުރާ އަންހެނުންނަށް ޝަރަފާއި އިއްޒަތް ދިނުމާއި އަންހެނުންގެ ހިއްސާ މަދު ދާއިރާތަކަށް އަންހެނުންގެ ހިއްސާ އިތުރުކުރުމާއި، އަދި އާ ދާއިރާތައް ތައާރަފް ކޮށް އެދާއިރާތަކަށް އަންހެނުން ނެރުމަށް ބާރު އެޅުން ހިމެނޭ ކަމަށް ސަރުކާރުން ވަނީ ބުނެފައެވެ.

ރެހެންދި އެވޯޑް ދޭން ފަށާފައިވަނީ 2014 ވަނަ އަހަރުން ފެށިގެންނެވެ.