ރެސްޓޯރެންޓެއްގެ ތެރޭގައި ވަޅިން ހަމަލާ ދީ ބަންގްލްދޭޝް މީހާ މަރާލި މައްސަލައިގައި ހޯދަމުން ދިޔަ ޕާކިސްތާން މީހާ ހައްޔަރުކޮށްފިއެވެ.

ހުޅުމާލޭގެ ޚާންޖީ ރެސްޓޯރެންޓްގައި އިއްޔެ ހަވީރު ވަޅިން ހަމަލާދީ އެތަނުގެ ވެއިޓަރެއްގެ ގޮތުގައި މަސައްކަތް ކުރާ ބަންގުލަދޭޝް މީހާ މަރާލި މައްސަލައިގައި ރޭ ދަންވަރު ހައްޔަރުކޮށްފައިވަނީ އެ ރެސްޓޯރެންޓް ޝެފެއްގެ ގޮތުގައި މަސައްކަތްކުރާ ޕާކިސްތާނުގެ ރައްޔިތެއް ކަމަށްވާ އުމުރުން 26 އަހަރުގެ މުހައްމަދު އާބިދެވެ.

ފުލުހުން އޭނާ ހައްޔަރުކޮށްފައިވަނީ ބަންގުލަދޭޝް މީހާ މަރާލުމަށްފަހު ފިލައިގެން އުޅެނިކޮށް ހުޅުމާލޭ ފޭސް-2 ގެ ބީޗް ސަރަޙައްދުންނެވެ. އެ މައްސަލައާ ގުޅިގެން އިތުރުމީހަކު ހައްޔަރުކޮށްފައިނުވާކަމަށް ފުލުހުންވަނީ ބުނެފައެވެ.

We have apprehended Muhammad Abid, 26-year-old male Pakistani national, in relation to the homicide.

This case is being investigated by the Serious and Organized Crime Department of Maldives Police Service with utmost diligence.

— Maldives Police (@PoliceMv) April 16, 2022

ފުލުހުން ރޭ ވަނީ އޭނާގެ ފޮޓޯ އާންމުކޮށް އޭނާ ހޯދުމަށް އާންމުންގެ އެހީތެރިކަމަށް އެދިފައެވެ. އާބިދަކީ ނުރައްކާތެރި މީހެއްކަމަށް ފުލުހުން މަޢުލޫމާތު ދީފައިވެއެވެ.

ފުލުހުން މީގެ ކުރިން ބުނެފައިވަނީ އޭނާ އަކީ ވަރަށް ނުރައްކާތެރި މީހެއް ކަމަށެވެ. ޕާކިސްތާނުގެ މުހައްމަދު އާބިދު، ބަންގްލަދޭޝްގެ މީހާއަށް ވަޅިން ހަމަލާދީފައިވަނީ އެ ރެސްޓޯރެންޓް ބަދިގެ ތެރޭގައި ހިނގި ޒުވާބެއްގެ ތެރެއިންނެެވެ. ބަންގްލަދޭޝްގެ މީހާގެ މޫނާއި ކަރާއި ފަޔަށާއި ބަނޑަށް ވެސް ވަނީ ވަޅި ހަރާފައެެވެ.

ބަންގުލަދޭޝް މީހާއަށް ހަމަލާދީ މަރާލި މީހާ މީގެ ކުރިން ވެސް އޭނާ އަށް އެކި ފަހަރުމަތިން ހަމަލާދީ މާރާމާރީ ހިންގާފައިވާ ކަމަށް އެ ރެސްޓޯރެންޓްގެ ބައެއް ބިދޭސީން ވަނީ ބުނެފައެވެ. އެމައްސަލައިގަައި ހައްޔަރުކޮށްފަައިވާ މުހައްމަދު އާބިދަކީ ވަރަށް ރުޅިގަދަ މީހެއް ކަމަށާއި، އޭނާ މީގެ ކުރިން އެ ރެސްޓޯރެންޓްގެ މުވައްޒަފުންނާއި މެދު ހިތްހަމަނުޖެހިގެން މާރާމާރީ ހިންގާ ކަމަށް އެތަނުގައި ބައެއް ބިދޭސީ މުވައްޒަފުން ބުނެފައިވެއެވެ.

މި މައްސަލަ ފުލުހުންގެ ސީރިއަސް އެންޑް އޯގަނިޒޭޝަން ޑިޕާޓްމެންޓުން މިހާރު ދަނީ ތަހުގީގު ކުރަމުންނެެވެ.