އިދިކޮޅު ޕީޕީއެމް/ޕީއެންސީ އިން ކުރިޔަށް ގެންދާ "އިންޑިއާ އައުޓް" ކެމްޕޭންގައި މާލޭގެ އެކި ސަރަހައްދުތަކުގައި ދަމަމުންދާ ބެނާތައް ނަގަން ނުކުންނަ ފުލުހުންނަށް އާދަމް ޝަރީފް އިންޒާރެއް ދެއްވައިފިއެވެ.

އާދަމް ޝަރީފް މިފަދައިން ވިދާޅުވީ، ޕީޕީއެމް އޮފީސް ހިންގާ ހ. ހުރަފާ ބޭރުގައި ހަރުކުރި "އިންޑިއާ އައުޓް" ބެނާ ނަގަން ފުލުހުން އެގޭގެ ވެރިފަރާތަށް މިއަދު އެންގުމާއި ގުޅިގެނެވެ. އެކަމާއި ގުޅުވައި އާދަމް ޝަރީފް މިރޭ ވިދާޅުވީ، ބެނާތައް ނަގަން ނުކުންނަ ފުލުހުން ގާނޫނާ ހިލާފަށް ހިންގާ އަމަލުތަކަށް ދައުވާ ކުރައްވާނެ ކަމަށެވެ. އަދި އިންޑިއާ ސިފައިން ރާއްޖޭގައި ތިބުމާއި ދެކޮޅަށް ހިންގާ ކެމްޕޭނަކީ ހިޔާލުފާޅު ކުރުމުގެ މިންގަނޑުގެ ތެރޭގައި ހިންގާ ހަރަކާތެއް ކަމަށް އޭނާ ވިދާޅުވިއެވެ. އަދި އެ ހަރަކާތް ނުހުއްޓުވޭނެ ކަމަށް ވެސް އޭނާ ވިދާޅުވިއެވެ.

"ހަބަރުދާރު! ބެނާތައް ނަގަން ނުކުންނަ ފުލުހުން ގާނޫނާއި ހިލާފަށް ހިންގާ އަމަލުތަކަށް ދައުވާކުރާނަން." އާދަމް ޝަރީފް ވިދާޅުވިއެވެ.

Habarudhaaru! Banner thah nagan nikunna fuluhun qaanoonaa khilaafah hingaa amaluthakah dhauvaa kuraanan! India sifain thibumaa dhekolhah hingaa campaign akee khiyaalu faalhukurumuge minganduge thereygai hingaa harakaatheh. Nuhutteveyne. https://t.co/3uzumfRoFl via @DhiyaresNews

— Adam Shareef Umar (@Adamshareefz) April 20, 2022

ފުލުހުންގެ އިދާރާއިން ހ. ހުރަފާގޭގެ ވެރިޔާ ހުސައިން ރަޝީދަށް ފޮނުވި އެންގުމެއްގައި ބުނެފައިވަނީ އެ ގޭގެ ބޭރުގައި އާންމުކޮށް ފެންނާނެހެން "އިންޑިއާ އައުޓް" ބެނާއެއް ހަރުކޮށްފައި ބެހެއްޓުމަކީ އިންޑިއާގެ ގަދަރާއި ކަރާމާތަށް އުނިކަން ލިބޭ ފަދަ އަމަލެއް ކަމަށެވެ. އަދި އެއީ ބައިނަލްއަގްވާމީ ގުޅުންތަކާއި އަވައްޓެރި ގައުމުތަކާއި ރާއްޖެއާ ދެމެދު އޮންނަ ހާރިޖީ އަދި ސަގާފީ ގުޅުންތަކަށް ނުރަނގަޅު އަސަރު ކުރާނެ ކަމެއް ކަމަށް އެންގުމުގައި ބުނެފައިވެއެވެ.

ނަމަވެސް، އިދިކޮޅުން ބުނެފައިވަނީ ރާއްޖޭގައި ތިބި އިންޑިއާ ސިފައިން ބާލަން ގޮވާލައި މާލޭގެ އިމާރާތްތަކުގައި ދަމާ އިންޑިޔާ އައުޓް ބެނާ ދެމުމަކީ ގާނޫނުލް އުގޫބާތާއި ހިލާފު ކަމެއް ނޫން ކަމަށެވެ. އަދި އެހަރަކާތް ނުހުއްޓުވޭނެ ކަމަށާއި ކުރިޔަށް އޮތްތަނުގައި ވެސް މި ހަރަކާތް އިތުރަށް ފުޅާކުރާނެކަމަށް ވަނީ ބުނެފައެވެ.