ދައުލަތަށް ގިނަ ދުވަސްތަކެއް ވަންދެން ހިދުމަތް ކުރައްވާފައިވާ ބ. ކުޑަރިކިލު ނޫރާނީމާގެ މުޙައްމަދު ޖަލީލް މިއަދުގެ ވަގުތެއްގައި އަވަހާރަވެފައިވާތީ، އެ އާއިލާއަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ފޯނުން ގުޅުއްވައި ތައުޒިޔާ ވިދާޅުވެއްޖެއެވެ.

އާއިލާއަށް ގުޅުއްވާ ރައީސް ވަނީ، މުޙައްމަދު ޖަލީލަކީ، ދިވެހި ސަރުކާރަށާއި ރައްޔިތުންނަށް ވަރަށް އިހުލާސްތެރި ހިދުމަތްތަކެއް ކޮށްދެއްވި އަދި ސަރުކާރުގެ ވަރަށް މުހިންމު މަގާމުތަކެއް ފުރުއްވާފައިވާ ވަރަށް ޚިދުމަތްތެރި ބޭފުޅެއްކަން ފާހަގަ ކުރައްވާފައެވެ.

މަރްހޫމް މުޙައްމަދު ޖަލީލަކީ ރައްޔިތުންގެ ހާއްސަ މަޖިލީހުގެ ބ. އަތޮޅުގެ މެންބަރުކަމާއި، ބ. އަތޮޅު އެޓަރނީ ޖެނެރަލްގެ އެހީތެރިޔާކަމާ، ކުޑަރިކިލު ކޯޓުގެ ގާޒީ ކަމާއި، އެޓޯލްސް މިނިސްޓްރީގެ ގިނަ މަގާމުތަކެއް ފުރުއްވި ބޭފުޅެކެވެ. މީގެ ތެރޭގައި އެޓޯލްސް މިނިސްޓްރީގެ ސީނިއަރ އަންޑަރ ސެކްރެޓަރީގެ މަގާމާއި، ވަކީލެއްގެ މަގާމާއި، ޑިރެކްޓަރެއްގެ މަގާމާއި، ސީނިއަރ އިންވެސްޓިގޭޓަރެއްގެ މަގާމާއި، އިންވެސްޓިގޭޓަރެއްގެ މަގާމު ހިމެނެއެވެ.

މީގެ އިތުރުން ވެސް މަރްހޫމް މުޙައްމަދު ޖަލީލް ވަނީ 26 ފަހަރެއްގެ މަތިން 13 އަތޮޅެއްގެ އަތޮޅު އޮފީސް ހިންގަވާފައެވެ. މީގެ ތެރޭގައި ހއ. އަތޮޅު އޮފީހާއި، ހދ. އަތޮޅު އޮފީހާއި، ށ. އަތޮޅު އޮފީހާއި، ޅ. އަތޮޅު އޮފީހާއި، ކ. އަތޮޅު އޮފީހާއި، އއ. އަތޮޅު އޮފީހާއި، އދ. އަތޮޅު އޮފީހާއި، ފ. އަތޮޅު އޮފީހާއި، ތ. އަތޮޅު އޮފީހާއި، ލ. އަތޮޅު އޮފީހާއި، ގއ. އަތޮޅު އޮފީހާއި، ގދ. އަތޮޅު އޮފީހާއި، ޏ. އަތޮޅު އޮފީސް ހިމެނެއެވެ.

މަރްޙޫމް މުޙައްމަދު ޖަލީލް އަވަހާރަވިއިރު އުމުރުފުޅަކީ 74 އަހަރެވެ.