ދައުލަތަށް ލިބެންޖެހޭ 1.5 މިލިއަން ރުފިޔާ އަނބުރާ ހޯދުމަށް އެންޓި ކޮރަޕްޝަން ކޮމިޝަން، އޭސީސީން ދަޢުލަތުގެ ކަމާގުޅުން ހުރި އިދާރާތަކަށް އަންގައިފިއެވެ.

އޭސީސީން މިއަދު ބުނީ، އެފައިސާއަކީ ކޮމިޝަނުން ވޭތުވެދިޔަ 01 މަސްދުވަހުގެ ތެރޭގައި ތަޙްޤީޤުކޮށް ނިންމި މައްސަލަތަކުގައި ހިމެނޭ ފައިސާ ކަމަށެވެ. އެގޮތުން 1,570,814.44 (އެއްމިލިއަން ފަސްސަތޭކަ ހަތްދިހަހާސް އަށްސަތޭކަ ސާދަ ރުފިޔާ ސާޅީސް ހަތަރު ލާރި) އަނބުރާ ހޯދުމަށް އެދި، ކަމާގުޅުން ހުރި އިދާރާތަކަށް އަންގާފައިވާނެކަމަށް އޭސީސީން ވަނީ ބުނެފައެވެ.

އެންޓި-ކޮރަޕްޝަން ކޮމިޝަނުން 1.5 މިލިއަނަށްވުރެ ގިނަ ރުފިޔާ ދައުލަތައް އަނބުރާ ހޯދުމަށް، ކަމާގުޅުން ހުރި އިދާރާތަކަށް އަންގައިފި pic.twitter.com/3Ytrdn7T4q

— ACC-MALDIVES (@ACC_Maldives) April 27, 2022

މިއަހަރުގެ މާރޗް މަހުގެ 17 ވަނަ ދުވަހު މަޤާމާ ޙަވާލުވެ ވަޑައިގެންނެވި އޭސީސީގެ މެމްބަރުން ބޭއްވެވި ނޫސްވެރިންގެ ބައްދަލުވުމުގައި ވިދާޅުވީ ތަހުގީގް މަރުހަލާގައި 1124 މައްސަލަ އެބައޮތްކަމަށާއި އަދި އަހަރުގެ ފުރަތަމަ ކުއާޓާގައި ނިންމުމަށް މީގެ ތެރެއިން 136 މައްސަލައޮތް އޮތްއިރު، 162 މައްސަލައެއް އިވެލުއޭޝަން ނިންމައި، ކޮމިޝަންގެ މެމްބަރުންނާއި ހަމައަށް ލިބިފައިވާކަމަށެވެ. އަދި މީގެ ތެރެއިން 12 މައްސަލަ ކޮމިޝަނުން ނިންމާފައިވާކަމަށްވެސް އެކޮމިޝަނުގެ މެމްބަރުން ވިދާޅުވިއެވެ.

މިހާރުގެ ކޮމިޝަނުން އެންމެބޮޑު އިސްކަމެއް ދޭނީ ދަޢުލަތުން ގެއްލިފައިވާ ފައިސާ އަލުން ރިކަވަރ ކުރުމަށްކަމަށް އޭސީސީގެ މެންބަރުން ވަނީ ވިދާޅުވެފައެވެ. އަދި ގެއްލިގެންދާ ފައިސާ ހޯދުމަށް ކަމާބެހޭ މުއައްސަސާތައް ގުޅިގެން މަސައްކަތް ކުރަން ޖެހޭކަން ފާހަގަކޮށް ކޮމިޝަނުގެ އައު މެމްބަރުން ވަނީ ފުލުހުންނާއި، ދައުލަތުގެ ޕްރޮސެކިއުޓަރުންނާ އެކުވެސް ބައްދަލުކުރައްވާފައެވެ.