ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ހަމަލާއަށް ފަންޑު ކުރި މީހުން އަވަހަށް ހޯދުމަށް ރައްޔިތުންގެ މަޖިލީހުގެ އިދާރާއިން ގޮވާލައިފިއެވެ.

މެއި 6 2021ގައި ރައީސް ނަޝީދަށް ދިން ބޮމުގެ ޙަމަލާއަށް އެއްއަހަރު ވުމާއި ގުޅިގެން، މަޖިލީހުގެ އިދާރާއިން އާއްމުކޮށްފައިވާ ބަޔާނެއްގައި ބުނީ އެ ޙަމަލާއަކީ ހަމައެކަނި ކުރީގެ ރައީސަކަށް އަމާޒުކޮށް ދީފައިވާ ޙަމަލާއެއް ނޫން ކަމަށެވެ. އެ ޙަމަލާއަކީ މުޅި ދިވެހި ދައުލަތާއި، ދިވެހި މުޖްތަމައުއާއި ދެކޮޅަށް ދިން ހަމަލާއެއް ކަމަށް ބަޔާނުގައިވެއެވެ. އަދި އެއީ ގާނޫނުގެ ބާރާއި ދީމިޤްރާތީ މުވައްސަސާތަކަށް ދިން ހަމަލާއެއް ކަމަށާއި ހާއްސަކޮށް ދިވެހިން ބުރަ މަސައްކަތުން ކޮޅަށް ޖަހާފައިވާ އިޤްތިޞާދާ ދެކޮޅަށް ދިން ޙަމަލާއެއް ކަމަށް އެ ބަޔާނުގައި ވެއެވެ.

ރައީސް ނަޝީދަށް ދިން ޓެރަރިސްޓް ޙަމަލާގެ ފަހަތުގައި ތިބި މާލީ ވާގިވެރިންނާއި އެހެނިހެން ފަރާތްތަކުގެ މައްސަލަތައް އަވަހަށް ތަޙުޤީޤު ކުރުމަށްވެސް މަޖިލީހުން ވަނީ ގޮވާލާފައެވެ. އަދި މުޖުތަމައުގެ ސަލާމަތާއި ރައްކާތެރިކަން ޤާއިމުކުރުމަށް އިންސާފު ހޯދުމަށްކުރާ މަސައްކަތުގައި އެއްބައިވަންތަކަމާއި ސާބިތުކަމާއެކު ދެމިތިބުން މުހިންމުކަމަށްވެސް އެ ބަޔާނުގައިވެއެވެ.

"ޓެރަރިސްޓް ހަމަލާގެ ފަހަތުގައި ތިބި މާލީ ވާގިވެރިންނާއި، އެހެނިހެން ފަރާތްތަކުގެ މައްސަލަ އަވަހަށް ތަޙްޤީޤުކުރުމުގެ މުހިންމުކަން މި ހިނދުގައި ފާހަގަކުރަމެވެ.. އެފަދަ ހުރިހާ ހަމަލާތަކެއް ތަޙްޤީޤުކޮށް ޝަރީޢަތް ހިންގައި އެކަމުގައި ޝާމިލުވާ ހުރިހާ ފަރާތްތައް އިންސާފުގެ ކުރިމައްޗަށް ގެނައުމަކީ މި ޤައުމުގެ ހުރިހާ ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމަށް ކުރަންޖެހޭ ކަމެއް." މަޖިލީހުގެ ބަޔާނުގައި ވެއެވެ.

މަޖިލީހުގެ ބަޔާނުގައި ބުނެފައިވަނީ، އެ ޙަމަލާދިން ކަމަށް ތުހުމަތު ކުރެވޭ މީހުންގެ ޝަރީއަތްތައް ލަސްވުމަކީ ބޮޑު ކަންބޮޑުވުމެއް ކަމަށެވެ. އެގޮތުން ދަޢުވާ އުފުލާފައިވާ 09 މީހުންގެ ތެރެއިން އެންމެ މީހަކު ފިޔަވާ ބާކީ ތިބި މީހުންގެ ޝަރީއަތްތައް އެކި ސަބަބުތަކާއިހުރެ މަޑުޖެހިފައިވާ ކަމަށް ބަޔާނުގައި ވެއެވެ.

މެއި 6ގެ ހަމަލާގެ ސަބަބުން ރައީސް ނަޝީދަށް މިނިވަންކަމާއެކު ދިރިއުޅުއްވުމަށް ހުރަސްއެޅިފައިވާ ކަމަށާއި އަދި އެ މައްސަލާގައި އިންސާފު ނުލިބޭހާ ހިނދަކު ރަސްމީ މަސައްކަތުގެ ވާޖިބުތައް އަދާކުރުމުގައި އެމަނިކުފާނުގެ ގިނަ ޙައްޤުތަކެއް ހިފެހެއްޓިފައިވާކަންވެސް މަޖިލީހުގެ ބަޔާނުގައި ވަނީ ފާހަގަކޮށްފައެވެ.

ރައީސް ނަޝީދު އަވަހާރަކޮށްލަން ދިން ޓެރަރިޒަމްގެ ހަމަލާގެ ތަހުގީގުތައް އަދިވެސް ކުރިޔަށް ދާއިރު މައްސަލައިގައި މިހާތަނަށް ހުކުމެއް އައީ އެންމެ މީހެއްގެ މައްޗަށެވެ.