21 މިލިއަން ރުފިޔާގެ ޑްރަގްސް މައްސަލާގައި ދެމީހަކު ހައްޔަރުކޮށްފިއެވެ.

މޯލްޑިވްސް ކަސްޓަމްސް ސަރވިސުން މިއަދު ބުނީ މިމަހުގެ 3 ވަނަ ދުވަހު ވައިގެ މަގުން ރާއްޖެއައި ފަސިންޖަރެއްގެ ލަގެޖް ބަލައިފާސްކުރުމުގެ ތެރޭގައި، 4،226 ގްރާމްގެ މަސްތުވާތަކެތި ފެނިފައިވާ ކަމަށެވެ. އަދި އަތުލައިގަނެވުނު ތަކެތި ފުރަތަމަ މަރުހަލާގައި ތަޙުލީލުކުރިއިރު، މަސްތުވާތަކެތީގެ ބާވަތެއް ކަމަށްވާ ކޮކެއިނަށް ވަނީ ޕޮޒިޓިވް ވެފައިކަމަށް ކަސްޓަމްސުން މަޢުލޫމާތު ދީފައިވެއެވެ.

ފުލުހުން ބުނީ އެމައްސަލާގައި ބިދޭސީ ފިރިހެނަކާއި ދިވެހި ފިރިހެނަކު ހައްޔަރުކޮށްފައިވާ ކަމަށެވެ. އަދި އެ މީހުންގެ ބަންދަށް ކޯޓުން 15 ދުވަހުގެ މުއްދަތެއް ދީފައިވާކަމަށް ވެސް ފުލުހުން ވަނީ ބުނެފައެވެ.

ކަސްޓަމްސުން ބުނީ މިމައްސަލައިގައި އަތުލައިގަނެވުނު މަސްތުވާތަކެތީގެ ބަރުދަނުގައި ޖުމްލަ 4.2 ކިލޯ ހުރިއިރު، މިތަކެތީގެ މަގުމަތީ އަގު އެކާވީސް މިލިއަން ރުފިޔާއަށް އަރާކަމަށެވެ.

ރާއްޖެއަށް ވައިގެމަގުން ދޭތެރެ ދޭތެރެއިން މަސްތުވާތަކެތި އެތެރެކުރަން މަސައްކަތް ކުރެއެވެ. އެގޮތުން އެފަދަ ބައެއްފަހަރުތަކުގައި ގިނަ އަދަދެއްގެ މަސްތުވާތަކެތި އަތުލައިގެންފައިވެސް ވެއެވެ.