ހުޅުމާލޭގެ ދެވަނަ ފިޔަވަހީގައި އިމާރާތް ކޮށްފައިވާ ހިޔާ ޓަވަރުތަކުގެ ތެރެއިން ދެ ޓަވަރެއްގައި ސީސީޓީވީ ކެމެރާ ހަރުކޮށް ބޭނުންކުރަން ފަށައިފިއެވެ.

ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިއަދު ބުނީ، ހިޔާ ސަރަހައްދުގެ ސަލާމަތާއި ރައްކާތެރިކަން ކަށަވަރުކޮށް އިތުރަށް ހަރުދަނާ ކުރުމަށްޓަކައި ހިޔާ ޓަވަރުތަކުގައި ސީސީޓީވީ ކެމެރާ ހަރު ކުރުމުގެ މަސައްކަތް ކުރިޔަށް ދާކަމަށާއި، އެ ޕްރޮޖެކްޓްގެ ދަށުން ދެ ޓަވަރެއްގައި ކެމެރާ ހަރުކޮށް ބޭނުންކުރަން ފަށާފައިވާކަމަށެވެ.

މިހާތަނަށް ކެމެރާ ހަރުކޮށް ބޭނުންކުރަން ފަށާފައިވަނީ ޓަވަރު 13 އަދި 14 ގައިކަމަށް އެޗްޑީސީން މައުލޫމާތު ދެއެވެ.

ހިޔާ ފުލެޓުތަކުގައި މީހުން ދިރިއުޅެން ފަށާފައިވާއިރު، އެ ސަރަހައްދުގައި އެކިކަހަލަ ކުށްކުށަށް އަރައިގަތުން ދަނީ އާންމުވަމުންނެވެ. އެހެންކަމުން އެ ސަރަހައްދުގެ ރައްކާތެރިކަން ކަށަވަރު ކުރުމަށް ފުލުހުންވެސް ދަނީ އެޗްޑީސީއާއި ގުޅިގެން މަސައްކަތްތަކެއް ކުރަމުންނެވެ.

ކުރީ ސަރުކާރުން ހުޅުމާލޭގެ ދެވަނަ ފިޔަވަހީގައި 25 ބުރީގެ 16 ޓަވަރު އިމާރާތް ކޮށްފައި ވެއެވެ.