10 ރަށެއްގައި ސިއްޙީ މަރުކަޒު ތަރައްޤީކުރުމަށް ޓެންޑަރަށް ފޮނުވައިފިއެވެ.

ސިއްހަތާބެހޭ ވުޒާރާއިން މިއަދު ބުނީ ސަރުކާރުން ޞިއްހީ ދާއިރާގެ ޙިދުމަތްތައް ލާމަރުކަޒުކޮށް ތަރައްޤީ ކުރުމަށް ކުރެވޭ މަސައްކަތްތަކުގެ ތެރެއިން މިއަހަރު އިމާރާތްކުރުމަށް ހަމަޖެހިފައިވާ ހެލްތް ސެންޓަރތައް ޓެންޑަރ ކުރުމަށް މިއަދު ވަނީ ދަޢުލަތުގެ މާލީ ވުޒާރާއަށް ފޮނުވާފައި ކަމަށެވެ.

ސިއްޙަތާބެހޭ ވުޒާރާއިން ބުނީ އާ ހެލްތް ސެންޓަރތައް އިމާރަތްކުރަން ހަމަޖެހިފައިވާ ރަށްރަށަކީ ށ. ގޮއިދޫ, އއ.އުކުޅަސް, އއ.ތޮއްޑޫ, ރ.އިނގުރައިދޫ, ނ.މާފަރު, ށ.ކަނޑިތީމު, ކ.ގާފަރު, ހދ.މަކުނުދޫ, ހއ.ކެލާ އަދި ފ.ފީއައްޔެވެ.

މީގެ އިތުރުން ވެސް މިއަހަރު ބަޖެޓް ކުރެވިފައިވާ ހޮސްޕިޓަލް ތަކާއި ހެލްތު ސެންޓަރތައް އިމާރާތްކުރުމަށް ޓެންޑަރަށް ފޮނުވުމުގެ މަސައްކަތް ކުރިޔަށް ގެންދާ ކަމަށް ހެލްތު މިނިސްޓްރީންވަނީ ބުނެފައެވެ.

ސަރުކާރުން ސިއްޙީ ދާއިރާއަށް ގެންނަމުންދާ ބަދަލުތަކުގެ ތެރެއިން އަތޮޅުތެރޭގައި ސިއްހީ ޚިދުމަތްތައް ފުޅާކޮށް ދެވޭނެ އިންތިޒާމް ހަމަޖެއްސުމުގެ މަސައްކަތް އަންނަނީ ކުރަމުންނެވެ. އެގޮތުން މިހާރުވެސް ކުވައިތް ފަންޑްގެ އެހީގައި 30 އެނދުގެ ހޮސްޕިޓަލްތައް އިމާރާތްކުރަން ވަނީ ބީލަމަށް ހުޅުވާލާފައެވެ. އަދި ސިއްހީ މަރުކަޒުތަކަށާއި ހޮސްޕިޓަލްތަކަށް އިތުރުކުރަން ޖެހޭ 17 މަޝްރޫއެއްގެ ތެރެއިން 8 މަޝްރޫއެއް ކުރިއަށް ގެންދިއުމަށް އެއްބަސްވުންތަކުގައި ވަނީ ސޮއިކޮށްފައެވެ.