ޝަރުޢީ ދާއިރާގެ ޚަބަރުތައް ކަވަރުކުރާ ނޫސްވެރިންނަށް އަމާޒުކޮށް ވޯކްޝޮޕެއް މޯލްޑިވްސް މީޑިއާ ކައުންސިލުން ފަށައިފިއެވެ.

އިސްކަންދަރު ކޮށީގައި އެއް ދުވަހުގެ މުއްދަތަކަށް ކުރިއަށްގެންދާ މި ވޯކްޝޮޕްގައި ކޯޓުގައި ހިނގާ މައްސަލަތައް ކުރިއަށްދާގޮތާއި، އަޑުއެހުންތަކަށް ހާޟިރުވެ ރިޕޯޓްކުރުމުގައި ނޫސްވެރިން ސަމާލުކަންދޭންވީ ކަންތައްތަކުގެ މަޢުލޫމާތު ފޯރުކޮށްދޭނެއެވެ. އޭގެ އިތުރުން ކޯޓުތަކުގައި ވަކާލާތުކުރާ ފަރާތާއި މީޑިއާއާއެކު ބާއްވަންޖެހޭ ގުޅުމާބެހޭ މަޢުލޫމާތު ދޭނެކަމަށް މީޑިއާ ކައުންސިލުން މަޢުލޫމާތު ދީފައިވެއެވެ. ހަމައެއާއެކު ޕްރައިވެސީއާއި ދެނެގަތުމުގެ ޙައްޤާއި، އަދުލުގެ އިންސާފުގެ ނިޒާމުގެ މައިގަނޑު ޤާނޫނުތަކަކީ ކޮބައިކަން ކިޔައިދޭނެކަމަށް މީޑިއާ ކައުންސިލުން ވަނީ ބުނެފައެވެ.



ކޯޓް ރިޕޯޓިންގ" ވަރކްޝޮޕް ފެށުމުގެގޮތުން ބޭއްވި ރަސްމިއްޔާތުގައި ވާހަކަދައްކަވަމުން މީޑިއާ ކައުންސިލުގެ ރައީސް، ސަހުބާން ފަހުމީ ވިދާޅުވީ، ރާއްޖޭގައި ޝަރުޢީ ދާއިރާގެ ޚަބަރުތައް ކަވަރކުރުމުގައި ހަރަކާތްތެރިވާ ނޫސްވެރިން މަދުކަމަށެވެ. އެހެންކަމުން ޝަރުޢީ ދާއިރާގެ ޚަބަރުތައް ކަވަރުކުރާ ނޫސްވެރިން ތަމްރީންކޮށް، ޚަބަރާއި މަޢުލޫމާތު ގެނެސްދިނުމުގައި ޤާނޫނީ އޮނިގަނޑުގެ ތެރެއިން ނޫސްވެރިން މަސައްކަތްކުރުމަށް ބާރުއެޅުމަކީ މުހިއްމުކަމެއްކަން އޭނާ ފާހަގަކުރެއްވިއެވެ.

މިފަދަ ވޯކްޝޮޕެއް ކުރިއަށްގެންދިއުމުގެ މަޤްޞަދަކީ ނޫސްވެރިންނަށް ސުލޫކީ މިންގަނޑު ހިފެހެއްޓުމަށް ބާރުއެޅުމާއި، ޤާނޫނީ މަރުޙަލާތައް ކިޔުންތެރިންނަށް ސާފުކޮށްދިނުމުގެ ހުނަރުތައް ދަސްކޮށްދިނުންކަމަށް މީޑިއާ ކައުންސިލުން މަޢުލޫމާތުދެއެވެ.