ލާމަރުކަޒީ ގާނޫނުގެ ދަށުން ލޯކަލް ކައުންސިލްތަކުން ހަދަންޖެހޭ ލޭންޑް ޔޫސް ޕްލޭންތައް ހެދުމުގައި އިންޑިއާގެ އެހީތެރިކަން ހޯދުމަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން އެދެފިއެވެ.

ލާމަރުކަޒީ ގާނޫނުގެ ދަށުން ކައުންސިލުތަކަށް ލިބޭ މާލީ ބާރުވެރިކަމާ ގުޅިފައިވާ ލޭންޑް ޔޫސް ޕްލޭންތައް ހަދާ އެލްޖީއޭއަށް ހުށަހަޅަންޖެހެއެވެ. ނަމަވެސް އެ ޕްލޭންތައް ނުހެދި ދިގުލައިގެން ގޮސްފައިވާކަން އެލްޖީއޭއިން ފާހަގަކުރެއެވެ.



މީޑިއާއަކާއި ވާހަކަދައްކަވަމުން އެލްޖީއޭގެ ސީއީއޯ އަފްޝަން ލަތީފް ވިދާޅުވީ ލޭންޑް ޔޫސް ޕްލޭން އެއްވެސް ވަރަކަށް ހެދިފައި ނެތް 44 ރަށެއް އެބައޮތްކަމަށެވެ. އަދި ކުރިން ޕްލޭންތައް ހުރި ރަށްތަކުގައިވެސް ޓެކްނިކަލް މައުލޫމާތު އެކުލަވާލުމުގައި، ރާއްޖޭގައި ފަންނީ ގާބިލުކަން ނެތުމުގެ ސަބަބުން ގިނަ ގޮންޖެހުންތައް ކުރިމަތިވެފައިކަން އޭނާ ފާހަގަކުރެއްވިއެވެ.

އަފްޝަން ވިދާޅުވި ލޭންޑް ޔޫސް ޕްލޭންތައް ހެދުމުގައި މާލީ އަދި ޓެކްނިކަލް އެހީ ހޯދަން އިންޑިއާގެ ހައިކޮމިޝަނަށް ހުށަހަޅާފައިވާކަމަށެވެ. އަދި މިކަމުގައި އިންޑިއާގެ އެހީތެރިކަން ލިބޭނެކަމުގެ އުއްމީދު ބޮޑުކަމަށް އޭނާ ވިދާޅުވިއެވެ.

ލާމަރުކަޒީ ގާނޫނަށް ސަރުކާރުން ގެނެސްފައިވާ އިސްލާހުތަކާއެކު ލޯކަލް ކައުންސިލްތަކަށް ވަނީ ބޮޑެތި ބާރުތަކާއި މަސްއޫލިއްޔަތުތައް ހަވާލުކޮށްފައެވެ. އެގޮތުން ދައުލަތުގެ އާމްދަނީގެ ފަސް ޕަސަންޓް ކައުންސިލްތަކަށް ހާއްސަ ކުރުމާއި، އިތުރުން، ބިމާއި ރަށާއި ފަޅާއި ފަރު ފަދަ ތަންތަނުން ލިބޭ ކުލީގެ އާމްދަނީގެ 40 އިންސައްތަ އަދި މީހުން ދިރިއުޅޭ ރަށްރަށުގެ އިހްތިސާސްގައިވާ ބިމުގެ ކުލީގެ އިތުރުން، ކައުންސިލްތަކުން ނަގާ ފީގެ އާމްދަނީ އެއްކޮށް ކައުންސިލްތަކަށް ވަނީ ދޫކޮށްލާފައެވެ.

މީގެއިތުރުން ކުންފުނި އުފައްދައިގެން ވިޔަފާރިކުރުމާއި، 5 މިލިއަން ރުފިޔާއަށް ކުޑަ މަޝްރޫއުތައް އިއުލާންކޮށްގެން ހިންގުމުގެ ބާރުވެސް ކައުންސިލްތަކަށް ވަނީ ދީފައެވެ.