މާލެއިން މިއަދު ކަރަންޓު ދިއުމަށް ދިމާވި މައްސަލައަށް ދާއިމީ ޙައްލެއް ގެންނަން ދެ ދުވަހެއްވަރު ނަގާނެ ކަމަށް ސްޓޭޓް އިލެކްޓްރިކް ކޮމްޕެނީ، ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފް ވިދާޅުވެއްޖެއެވެ.

މިއަދު މެންދުރުފަހު އޮތް ނޫސްވެރިންގެ ބައްދަލުވުމެއްގައި ޝަރީފް ވިދާޅުވީ، މައްސަލަ ޖެހުނު ކޭބަލް ބަދަލުކުރުމަށް ގާކޮށި ކައިރީގައި ހުރި ސަބް ސްޓޭޝަނާއި ހަމައަށް އިތުރު ކޭބަލެއް އަޅަންޖެހޭ ކަމަށާއި، އެކަމުގެ މަޝްވަރާތައް މާލެ ސިޓީ ކައުންސިލާއެކު ކުރަމުންދާ ކަމަށެވެ.

ޝަރީފް ވިދާޅުވީ، ކޭބަލަށް ގެއްލުންވެފައިވަނީ މަގު ކޮނުމުގެ ތެރޭގައި ކަމަށް ލަފާ ކުރެވޭ ކަމަށާއި، ކޭބަލް އެޅުމަށް ދެ ދުވަހެއްވަރު ނަގާނެކަމަށެވެ.

ރޭ ފަތިހު މާލޭގެ ބޮޑު ސަރަހައްދަކުން ވަނީ ކަރަންޓުގެ ހިދުމަތް މެދު ކެނޑިފައެވެ. އަދި އެމައްސަލަ ޙައްލު ކުރުމުގެ މަސައްކަތް ކުރަމުން ދަނިކޮށް މުޅި މާލެއިން ކަރަންޓުގެ ޚިދުމަތް މެދުކެނޑުނެވެ.

މާލެއިން ކަރަންޓު ކެނޑިފައިވަނީ މާލެއަށް ކަރަންޓު ފޯރުކޮށްދޭ 13 ފީޑަރުގެ ތެރެއިން 8 ވަނަ ފީޑަރުން ސްވިޗް ގިއަރަކަށް ދިމާވި މައްސަލައެއްގެ ސަބަބުންނެވެ. އަދި ފީޑަރު 8 ގައި ހިމެނޭ 9 ސަބް ސްޓޭޝަނަށް އެހެން ފީޑަރުތައް މެދުވެރިކޮށް ވަގުތީގޮތުން ކަރަންޓު ފޯރުކޮށްދީ މައްސަލަ ޙައްލުކޮށްފައިވާ ކަމަށް ސްޓެލްކޯއިން މަޢުލޫމާތުދެއެވެ.