ރާއްޖޭގައި ކުޑަކުދިންތަކަކަށް މުއްދަތުހަމަވެފައިވާ ވެކްސިން ދިން މައްސަލައެއް ފެންމަތިވެއްޖެ އެވެ.

މި މައްސަލަ މީޑިއާގެ ސަމާލުކަމަށް ގެނެސްފައިވަނީ ވިލިމާލޭ ދާއިރާގެ ރައްޔިތުންގެ މަޖިލީހުގެ މެންބަރު އަލްއުސްތާޛު އަޙްމަދު އުޝާމެވެ. އުޝާމް ރައްޔިތުންގެ މަޖިލީހުގައި ތަމްސީލް ކުރަށްވާ ވިލިމާލެ ހޮސްޕިޓަލްގައި ހިނގާފައިވާ މިޙާދިސާގެ ސަބަބުން ގިނަ ބަޔަކުދަނީ މީސް މީޑިއާގައި ކަންބޮޑުވުން ފާޅުކުރަމުންނެވެ.

އެކަމާގުޅޭގޮތުން އުޝާމް ވިދާޅުވީ ކުޑަކުދިންތަކަކަށް ދުވަސް ހަމަވެފައިވާ ވެކްސިނެއް ވިލިމާލެ ހޮސްޕިޓަލްގައި ދީފައިވާ ކަމުގެ ޝަކުވާ ގިނަ ރައްޔިތުންގެ ފަރާތުން ލިބިފައިވާ ކަމަށެވެ. މިއީ ވަރަށް ސީރިއަސް މައްސަލަ އެއް ކަމަށާ މިކަން ހިނގާފައިވާ ގޮތެއް ސަރުކާރުން ސާފުކޮށްދޭން ޖެހޭ ކަމަށް އުޝާމް ވިދާޅުވިއެވެ.

"ކުޑަކުދިންތަކަކަށް ދުވަސް ހަމަވެފައިވާ ވެކްސިންއެއް ވިލިމާލެ ހޮސްޕިޓަލްގައި ދީފައިވާ ކަމުގެ ޝަކުވާ ވިލިމާލޭގެ ގިނަ ރައްޔިތުންގެ ފަރާތުން އެބަލިބޭ. މިއީ ވަރަށް ސީރިއަސް މައްސަލައެއް. މިފަދަ ކަމެއް ހިނގާފައިވާ ގޮތެއް ސަރުކާރުން ސާފުކޮށްދޭން ޖެހޭ." ހެލްތް މިނިސްޓްރީ އާއި ހެލްތު މިނިސްޓަރު ނަސީމް އާއި އައިޖީއެމްއެޗް ޓެގްކޮށް އުޝާމް މީސް މީޑިއާގައި ވިދާޅުވެފައިވެއެވެ.

ކުޑަކުދިންތަކަކަށް ދުވަސް ހަމަވެފައިވާ ވެކްސިންއެއް ވިލިމާލެ ހޮސްޕިޓަލްގައި ދީފައިވާ ކަމުގެ ޝަކުވާ ވިލިމާލޭގެ ގިނަ ރައްޔިތުންގެ ފަރާތުން އެބަލިބޭ. މިއީ ވަރަށް ސީރިއަސް މައްސަލައެއް. މިފަދަ ކަމެއް ހިނގާފައިވާ ގޮތެއް ސަރުކާރުން ސާފުކޮށްދޭން ޖެހޭ. @KerafaNaseem @HPA_MV @igmhmv pic.twitter.com/gjlnpZL3s2

— Ahmed Usham (@a_usham) May 26, 2022

އުޝާމްގެ މި ކަންބޮޑުވުމާގުޅޭގޮތުން ހެލްތް މިނިސްޓްރީއާއި ޙަވާލާދީ ބައެއް މީޑިއާތަކުގައި ބުނެފައިވަނީ، ވިލިމާލޭ ހޮސްޕިޓަލްގައި މުއްދަތު ހަމަވެފައިހުރި ވެކްސިން ދިން ކަމުގެ ޝަކުވާ ލިބިފައިވާތީ އެކަން ބަލަމުން އަންނަ ކަމަށެވެ. އަދި އެއީ ހިނގި ކަމެއްކަން އެނގޭނީ ތަހުގީގެއް ކުރުމުން ކަމަށާއި ޖެހީ ކޮންކަހަލަ ވެކްސިނެއްކަންވެސް އެނގޭނީ އޭރުން ކަމަށް ހެލްތު މިނިސްޓްރީގެ އޮފިޝަލުންނާ ޙަވާލާދީ ރާއްޖޭގެ މީޑިއާގައި ރިޕޯޓް ކޮށްފައިވެއެވެ.

މުއްދަތުހަމަވެފައިވާ ވެކްސިންގެ އާންމުވެފައިވާ ފޮޓޯއިން ފެންނަ ގޮތުން، ފެބްރުއަރީ 2020 ގައި އުފެއްދި އެ ވެކްސިން މިދިޔަ ޖެނުއަރީ އެކެއްގައި ވަނީ މުއްދަތު ހަމަވެފައެވެ.