މި ހިނގާ މެއި މަހުގެ މިހާތަނަށް ރެކޯޑު އަދަދަކަށް ފަތުރުވެރިން ރާއްޖެއަށް ޒިޔާރަތް ކޮށްފިކަމަށް ޓޫރިޒަމް މިނިސްޓްރީން ބުނެފިއެވެ.

ޓޫރިޒަމް މިނިސްޓްރީން މިއަދު ބުނީ، 2019 ވަނަ އަހަރުގެ މެއި މަހު ރާއްޖެއަށް ޒިޔާރަތް ކޮށްފައިވަނީ، 103,022 ފަތުރުވެރިންކަމަށެވެ. ނަމަވެސް، މިމަހުގެ މިހާތަނަށް 125,000 ފަތުރުވެރިން ޒިޔާރަތް ކޮށްފައިވާކަމަށް މިނިސްޓްރީން ބުނެފައި ވެއެވެ. މި ކާމިޔާބީއާއިއެކު އެ މިނިސްޓްރީން ވަނީ، މި ކާމިޔާބީގައި ހިއްސާވާ އެންމެހާ ފަރާތްތަކަށް ޝުކުރު އަދާކޮށް މަރުހަބާ ކިޔާފައެވެ.

ރާއްޖެއަށް ޒިޔާރަތްކުރާ ފަތުރުވެރިންގެ އަދަދު އިތުރުވަމުން އަންނައިރު، ޓޫރިޒަމް މިނިސްޓަރު ޑރ. މައުސޫމް މީގެކުރިން ވިދާޅުވެފައިވަނީ، ރާއްޖެއިން މިއަހަރު ފަތުރުވެރިކަމަށް ކަނޑައެޅި އަމާޒުތައް ހާސިލުވާނެކަމަށް ވަރަށް ބޮޑު ޔަގީންކަމެއް އެބައޮތްކަމަށެވެ.

މިނިސްޓަރު ވިދާޅުވެފައިވަނީ ފަތުރުވެރިކަމަށް ސަރުކާރުން މިއަހަރު ކަނޑައެޅީ 3 އަމާޒެއްކަމަށާއި، އެއީ 1.6 މިލިއަން ފަތުރުވެރިންނާއި، 1.7 މިލިއަން ފަތުރުވެރިން އަދި 1.8 މިލިއަން ފަތުރުވެރިންގެ އަމާޒެއްކަމަށެވެ. މިއީ ކޯވިޑާއި ގުޅިގެން ހާލަތަށް އައި ބަދަލުތަކާއެކު ކަނޑައެޅި އަމާޒުތަކެކެވެ.

މިއަހަރު އޭޕްރީލް މަހާއިހަމައަށް މިހާތަނަށް ރާއްޖެއަށް 621633 ފަތުރުވެރިން ޒިޔާރަތްކޮށްފައިވެއެވެ. ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ރާއްޖެއަށް އަންނަ ފަތުރުވެރިން އެވްރެޖްކޮށް ރާއްޖޭގައި 8 ދުވަހުގެ ޗުއްޓީއެއް ހޭދަކުރެއެވެ.