އެމްޑަބްލިޔުއެސްސީން ބިއްލޫރި ފުޅީގައި ފެން ބަންދުކުރުމަށްޓަކައި ހަދަންޖެހޭ ދިރާސާތައް ހެދުމަށްފަހު، އަމަލީ މަސައްކަތް ފަށައިފިއެވެ.

އެމްޑަބްލިޔުއެސްސީގެ މެނޭޖިންގ ޑިރެކްޓަރ އަދި ސީއީއޯ ހަސަން ޝާހު ވިދާޅުވީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސިންގަލް ޔޫސް ޕްލާސްޓިކް ސިޔާސަތަކީ އެ ކުންފުނީގެ އުފެއްދުންތެރިކަމާއި، ގުޅުންހުރި ބޮޑު ބަދަލެއް ގެނުވާ ސިޔާސަތެއްކަމަށެވެ. އަދި އެމްޑަބްލިއުއެސްސީން އަންނަނީ ބިއްލޫރި ފުޅީގައި ފެން ބަންދުކޮށްގެން ވިއްކުމުގެ މަސައްކަތް ފެށުމަށް ތައްޔާރުވަމުންކަމަށް ޝާހު ވިދާޅުވިއެވެ. އެގޮތުން އެކަމަށް ހަދަންޖެހޭ ދިރާސާތައް ހެދުމަށްފަހު އަމަލީ މަސައްކަތް މިހާރު ފަށާފައިވާކަމަށް ޝާހު ވިދާޅުވިއެވެ.

ޝާހު ވިދާޅުވީ އެ މަސައްކަތުގެ ދަށުން ބިއްލޫރިފުޅި ސަޕްލައިކޮށްދޭނެ ބަޔަކުވެސް މިހާރު ހޯދާފަައިވާކަމަށެވެ.

"މިދެންނެވި ދިރާސާގެ މަސައްކަތައް ފަހު ބޭނުންވާ މަސައްކަތުގެ އަމަލީ މަސައްކަތް މިހާރު ކުރިއަށް އެބަދޭ. މިއީ ކާރުހާނާގެ ބޮޓްލިންގ ލައިނަށް ބޮޑު ބަދަލެއް އަންނާނެ ކަމެއް. މިދެންނެވި ބަދަލު ގެނައުމުގެ އަމަލީ މަސައްކަތް މިހާރު އެވަނީ ފެށިފައި. ބޭނުންވާ ބިއްލޫރި ފުޅި ސަޕްލައިކޮށްދޭނެ ސަޕްލަޔަރުން ވަނީ ހޯދިފައި" ޝާހު ވިދާޅުވިއެވެ.

ބިއްލޫރި ފުޅީގައި ފެން ބަންދުކުރުމުގެ މަސައްކަތް އެމްޑަބްލިއުއެސްސީން ފަށާފައިވަނީ މިސަރުކާރުގެ ސްޓްރެޓެޖިކް އެކްޝަން ޕްލޭންގެ ދަށުން ޕްލާސްޓިކް މަދުކުރުގެ ސިޔާސަތަށް އެއްބާރުލުން ދިނުމުގެ ގޮތުންނެވެ.

އަންނަ އަހަރުގެ ޑިސެމްބަރު މަހުން ފެށިގެން 1 ލީޓަރާއި 1 ލީޓަރަށްވުރެ ކުދި ޕްލާސްޓިކު ފުޅީގައި ރާއްޖޭގައި ފެން ބަންދުކުރުމުގެ މަސައްކަތް ކުރުމަކީ މަނާކަމެވެ. އަދި 2024ގެ މާރިޗުމަހުން ފެށިގެން ރާއްޖޭގެ ބާޒާރުގައި އެސައިޒްގެ ޕްލާސްޓިކް ފުޅި ވިއްކުމަކީވެސް މަނާކަމެއް ކަމަށް ސަރުކާރުން ވަނީ ކަނޑައަޅާފައެވެ.