4 ރަށެއްގައި ހޮސްޕިޓަލް ޑިޒައިންކޮށް އިމާރާތްކުރުމަށް އިންޑިއާގެ ކުންފުންޏަކާ ހަވާލުކޮށްފި އެވެ.

ސިއްޙަތާބެހޭ ވުޒާރާއިން މިއަދު ބުނީ ހއ އަތޮޅު ހޮސްޕިޓަލާއި، ދ. އަތޮޅު ހޮސްޕިޓަލާއި، ގއ އަތޮޅު ހޮސްޕިޓަލްގެ އިތުރުން ރ އަލިފުށި ހޮސްޕިޓަލް ޑިޒައިންކޮށް އިމާރާތްކުރުމަށް ހަވާލުކޮށްފައިވަނީ އިންޑިއާގެ ޓެލެކޮމިއުނިކޭޝަން ކޮންސަލްޓަންޓްސް އިންޑިއާ ލިމިޓެޑް (ޓީސީއައިއެލް) އާ ކަމަށެވެ.

އަންސޮލިސިޓޭޑެޑް ޕްރޮޕޯސަލް ހުށަހެޅުމުގެ އުސޫލުގެ ތެރެއިން ކުރިއަށް ގެންދެވޭ މިޕްރޮޖެކްޓްގެ އަގު 57.2 މިލިއަން އެމެރިކާ ޑޮލަރަށް އަރައެވެ. މި ޕްރޮޖެކްޓަށް ފައިނޭންސްކުރުމަށް ހަމަޖެހިފައިވަނީ އިންޑިއަން އެގްޒިމް ބޭންކް އިން ބަޔާސް ކްރެޑިޓް ސްކީމްގެ ދަށުންނެވެ.

މި އެއްބަސްވުމުގައި ޓީސީއައިއެލްގެ ފަރާތުން ސޮއިކުރެއްވީ އެގްޒެކެޓިވް ޑިރެކްޓަރ އަތުލް ކުމާރު ޖެއިން އެވެ. އަދި ހެލްތު މިނިސްޓްރީގެ ފަރާތުން މިއެއްބަސްވުމުގައި ސޮއިކުރެއްވީ ސްޓޭޓް މިނިސްޓަރ އަޙްމަދު އާދިލް އެވެ.

މި ޕްރޮޖެކްޓްގެ ދަށުން ހއ. ދިއްދޫ، ދ. ކުޑަހުވަދޫ އަދި ގއ. ވިލިނިގލިީގައި އިމާރާތްކުރުމަށް ހަމަޖެހިފައިވަނީ 50 އެނދުގެ ހޮސްޕިޓަލްތަކެވެ. އަދި ރ. އަލިފުށީގައި އިމާރާތްކުރުމަށް ހަމަޖެހިފައިވަނީ 30 އެނދުގެ ހޮސްޕިޓަލެކެވެ.