އެމެރިކާއިން ރާއްޖެއަށް ފައިޒާ ވެކްސިންގެ އިތުރު 100،620 ޑޯޒް ހަދިޔާކޮށްފި އެވެ.

އެމެރިކާގެ މިޝަނުން މިއަދު ނެރެފައިވާ ބަޔާނެއްގައި ބުނެފައިވަނީ، މިއީ އދ. އިން ގާއިމްކޮށްފައިވާ "ކޮވެކްސް" ފެސިލިޓީގެ ދަށުން ހަދިޔާކޮށްފައިވާ ވެކްސިން ކަމަށެވެ. އޭގެ އިތުރުން އެމެރިކާ ސަރުކާރުގެ ޔޫއެސްއެއިޑް މެދުވެރިކޮށް ގިނަ އެހީތަކެއް ރާއްޖެއަށް ފޯރުކޮށްދީފައިވާ ކަމަށްވެސް ބަޔާނުގައިވެއެވެ.

އެގޮތުން ކޯވިޑް ވެކްސިން އަތޮޅުތެރެއަށް ފޯރުކޮށްދިނުމާއި ސިއްހީ ދާއިރާގެ މުވައްޒަފުންނަށް ތަމްރީނު ދިނުމާއި ރައްކާތެރިކަމާ އެކު ވެކްސިން ޖެހުމާއި ވެކްސިން ޖެހުމުގެ މުހިންމުކަމާ ގުޅޭ ގޮތުން އާންމުން ހޭލުންތެރިކުރުވުން ހިމެނެއެވެ.

"ވެކްސިން ހަދިޔާކުރުން ހިމެނޭ ގޮތަށް، އެމެރިކާ އިން ކޮވިޑް-19އާ ގުޅިގެން ދިން އިޖާބައަކީ އެމެރިކާ ރައްޔިތުންގެ ހަގީގީ ދީލަތިކަން ސިފކޮށްދޭ ކަމެއް. އަޅުގަނޑުމެން މި އަންނަނީ އެމެރިކާ ސައިންޓިސްޓުންނާއި އުފެއްދުންތެރިކަމުގެ ހުށިޔާރުކަމާއި އަޅުގަނޑުމެންގެ ލޮޖިސްޓިކްސް އަދި ބައިނަލްއަގުވާމީ ފެންވަރުގައި އޮޕަރޭޝަންތައް ހިންގުމުގެ ތަޖުރިބާ ބޭނުންކޮށްގެން، މުޅި ދުނިޔެއަށް ވެކްސިން ފޯރުކޮށްދިނުމުގައި އެހީވަމުން.،" ރާއްޖެއަށް އެމެރިކާ އިން ކަނޑައަޅާފައިވާ މިޝަންގެ ޝާޖޭ ޑި އެފެއާޒް އެންޑްރިއާ އެޕެލް ވިދާޅުވި އެވެ.

އެމެރިކާ މިޝަނުން ނެރެފައިވާ ބަޔާނުގައި އިތުރަށް ބުނެފައިވަނީ އެމެރިކާ އިން ފައިޒާ ވެކްސިންގެ ޖުމްލަ 439،920 ޑޯޒު ރާއްޖެއަށް ހަދިޔާކޮށްފައިވާ ކަމަށެވެ. އޭގެ އިތުރުން 7 މިލިއަން ޑޮލަރުގެ އެހީތެރިކަން ކޯވިޑްގެ ބަލިމަޑުކަން ފެށުނު ފަހުން ރާއްޖެއަށް ފޯރުކޮށް ދީފައިވާ ކަމަށް އެމެރިކާ މިޝަނުން ވަނީ ބުނެފައެވެ. ހަމައެއާއެކު އެމެރިކާއިންވަނީ ރާއްޖެއަށް 60 ވެންޓިލޭޓަރ ވެސް ހަދިޔާކޮށްފައެވެ.