މޯލްޑިވްސް މީޑިއާ ކައުންސިލް (އެމްއެމްސީ)ގެ ރައީސްގެ މަގާމުގައި ހުންނެވި ޝަހުބާން ފަހުމީ އެމަޤާމުން މިއަދު އިސްތިޢުފާ ދެއްވައިފިއެވެ.

ކިންގްސް ފޮރެކްސް ޓްރޭޑިންގެ ނަމުގައި ޝަހުބާންވެސް ހިއްސާވެގެން އުފައްދާފައިވާ ކުންފުންޏަކުން ޕޮންޒީ ސްކީމެއް ހިންގާކަމަށް ދައުލަތުގެ މާލީ އިދާރާތަކުން ވަނީ ތުހުމަތު ކޮށްފައެވެ. އަދި އެކަމުގައި މަނީލޯންޑަރިންގެ ޢަމަލުތަކެއް ހިންގާފައިވާ ކަމަށް ފުލުހުން ވަނީ ތުހުމަތުކޮށްފައެވެ.

މި ތުހުމަތާއިއެކު، އެމްއެމްސީގެ ރައީސްގެ މަގާމުން ޝަހުބާން ދުރުކުރުމަށްޓަކައި އޭނާގެ އިތުބާރު ނެތްކަމަށް ނެގި ދެ ވޯޓުން ޝަހުބާންވަނީ ސަލާމަތްވެ ވަޑައިގެންފައެވެ. ހަމައެއާއެކު މީޑިއާ ކައުންސިލްގެ ބައެއް މެންބަރުން ގެންދެވީ ކައުންސިލްގެ ބައްދަލުވުންތައް ބޮއިކޮޓް ކުރަށްވަމުންނެވެ.

ނަމަވެސް މިއަދުގެ މެންދުރުގެ ވަގުތެއްގައި ޝަހުބާން ވަނީ މަޤާމުން އިސްތިޢުފާ ދެއްވާފައެވެ. ސަބަބެއްކަމަށް ވިދާޅުވީ ރާއްޖޭގެ މީޑިއާތަކަށް އިޢާދަނުކުރެވޭނެ ގެއްލުންތަކެއް ލިބިދާނެ ކަމަށްޓަކައި އިސްތިޢުފާ ދެއްވާ ކަމަށެވެ. އަދި އޭނާގެ ނަފްސަށް މިވަގުތު ރައްކާތެރިކަމެއްނެތް ކަމަށްވެސް ޝަހުބާން ވިދާޅުވިއެވެ.

"އަޅުގަނޑު ދެން މީޑިއާ ކައުންސިލްގެ ރައީސް ކަމުގައި ހުރެއްޖެނަމަ، މީޑިއާ ކައުންސިލަށާއި، ނޫސްވެރިންނާއި މީޑިއާތަކަށް ލިބިދާނެ އިއާދަނުކުރެނިވި ގެއްލުމަކަށްޓަކާ އިސްތިއުފާ މިދެނީ." ޝަހުބާން މިއަދު ވިދާޅުވިއެވެ.

މޯލްޑިވްސް މީޑިއާ ކައުންސިލްގެ ހަ ވަނަ ދައުރުގެ ރައީސަކަށް ސަންގުޓީވީގެ ނިއުސްހެޑް ޝަހުބާން ފަހުމީ އިންތިޚާބުކޮށްފައިވަނީ 2020 ވަނަ އަހަރުގެ ޑިސެމްބަރ 15 ވަނަ ދުވަހުއެވެ.