ރާއްޖޭގެ އިގުތިސާދީ ހާލަތު އޮތީ ބަނގުރޫޓްވާ ހިސާބުގައި ނޫންކަމަށާއި ރާއްޖެ ބަނގުރޫޓް ނުވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް

މިއަދު ވިދާޅުވެއްޖެއެވެ.

މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ރައީސް ސާލިޙު ވިދާޅުވީ ރާއްޖޭގެ ރިޒާވް ހުސްވެ ރާއްޖެ ބަނގުރޫޓުވުމާ ހަމައަށް ނުދާނެކަމުގެ ފުރިހަމަ ޔަގީންކަން އެމަނިކުފާނަށް އެބައޮތް ކަމަށެވެ. ރައީސް ސާލިޙު ވިދާޅުވީ ދައުލަތުގެ ދަރަނި ދެއްކުމުގައި ބޮޑު ގޮންޖެހުމެއް ނެތް ކަމަށެވެ. ރައީސް ވިދާޅުވީ 2017 ވަނަ އަހަރު ނަގާފައި އޮތް ސަނީ ސައިޑް ބޮންޑު އެއްކޮށް ދައްކާ ނިންމާފައިވާ ކަމަށާއި އެއީ 250 މިލިއަން ޑޮލަރު ކަމަށެވެ.

ރައީސް ސާލިޙު ވިދާޅުވީ ސޮވެރިން ގެރެންޓީ ފަންޑަށް އެކަށީގެންވާ ފައިސާ ލަމުން އަންނަ ކަމަށެެވެ. އެގޮތުން މިހާރު ވެސް އެ ފަންޑުގައި ހަތަރު ބިލިއަން ރުފިޔާ އެބަހުރިކަން ރައީސް ވަނީ ފާހަގަކުރައްވާފައެވެ. އަދި ރާއްޖެއިން ދެން ލޯނަށް ބޮޑު އަދަދެއްގެ ފައިސާ ދައްކަން ޖެހޭނީ 2026 ވަނަ އަހަރުކަމަށާއި، އެއީ 600 މިލިއަން ޑޮލަރުކަމަށް އެމަނިކުފާނު ވިދާޅުވިއެވެ. 

މީގެ އިތުރުން ރައީސް ސާލިޙު ވިދާޅުވީ 2020 ވަނަ އަހަރު ނިމުނު އިރު ޖީޑީޕީގެ ނިސްބަތުން ދަރަނި ހުރީ 150 ޕަސަންޓުގައި ކަމަށެވެ. ނަމަވެސް މިހާރު 113 ޕަސަންޓަށް ދަރަނި ދަށްކޮށްފައިވާކަމަށް ރައީސް ވަނީ ފާހަގަކުރައްވާފައެވެ. ރައީސް ވިދާޅުވީ ސަރުކާރުގެ އަމާޒަކީ އެ އަދަދު 100 އަށް ދަށްކުރުން ކަމަށެވެ.

ރައީސް ވިދާޅުވީ މުޅި މި އަހަރަށް އެއްކޮށް ތެލާ ކާޑުގެ ބާވަތްތައް ގަންނަވަރަށް ޔޫޒަބަލް ރިޒާވުގައި ފައިސާ އެބަހުރި ކަމަށެވެ.