ރާއްޖޭގެ އިގުތިސާދީ ހާލަތާ މެދު އޮޅުންއަރާ ގޮތަށް ބައެއް ފަރާތްތަކުން ވާހަކަ ދައްކަނީ ސިޔާސީ ބޭނުމަށް ކަމަށް ރައީސް އިބްރާހީމް މުޙައްމަދު ޞާލިޙް މިއަދު ވިދާޅުވެއްޖެއެވެ.

ރައީސް އޮފީހުގައި މިހާރު ކުރިއަށްދާ ނޫސްވެރިންގެ ބައްދަލުވުމުގައި އެމަނިކުފާނު ވިދާޅުވީ މީޑިއާތަކުގައި ވެސް މިހާރު އެންމެ ބޮޑަށް ދެކެވޭ ވާހަކައަކީ ރާއްޖޭގެ އިގުތިސާދީ ހާލަތުގެ ވާހަކަ ކަމަށާއި އެކަމަކު އެ ވާހަކަ ބައެއް ފަރާތްތަކުން ދައްކަނީ ސިޔާސީ ބޭނުމަށް ސިޔާސީ މަންފާ ހޯދުމަށް ކަމަށެވެ. އަދި އެ ވާހަކަތައް ފަތުރަނީ ރައްޔިތުންގެ މެދުގައި ކަންބޮޑުވުމާއި އޮޅުންބޮޅުންވާ ގޮތަށް ކަމަށް އެމަނިކުފާނު ވިދާޅުވިއެވެ.

"ފަތުރަމުންދާ ވާހަކަތަކުގެ ތެރޭގައި ހަގީގަތާއި މާ ދުރު، އޮޅުން އަރާގޮތަށް ބައެއް ވާހަކަތައް ދައްކާކަން އަޅުގަނޑު ފާހަގަ ކޮށްލަން. އޭގެ ސަބަބުން ރައްޔިތުން ކަންބޮޑުވުމެއްގެ ތެރެއަށް ގޮސް، ހާސްކަމެއްގެ ތެރެއަށް އެބަދޭ. މީގެ ބައެއް ވާހަކަތައް ފަތުރަނީ ސިޔާސީ ބޭނުމަކަށްކަން ފާހަގަ ކޮށްލަން." ރައީސް ޞާލިޙް ވިދާޅުވިއެވެ.

އެމަނިކުފާނު ވިދާޅުވީ މިފަދަ ވާހަކަތަކަކީ ސިޔާސީ ބޭނުމަށް ދައްކަންޖެހޭ ވަރުގެ ވާހަކަތަކެއް ނޫންކަމަށެވެ. އަދި މިއީ އެއަށްވުރެ ސީރިއަސްކޮށް އެންމެން އެކީގައި މަސައްކަތްކޮށް ކުރިމަތީގައި އޮތް ކަންތައްތަކުން އަރައިގަތުމަށް މަސައްކަތް ކުރަންޖެހޭ ކަމެއްކަމަށް ވެސް އެމަނިކުފާނު ވިދާޅުވިއެވެ.

ރައީސް މިފަދައިން ވިދާޅުވެފައި މިވަނީ، ރާއްޖޭގެ އިގުތިސާދާއި ގުޅޭގޮތުން އެކި ފަރާތްތަކުން ކަންބޮޑުވުން ފާޅު ކުރަމުން ދާ ދަނޑިވަޅެއްގައެވެ. އެގޮތުން، ރާއްޖޭގެ ދަރަނި 100 ބިލިއަނާއި ގާތްކޮށްފައިވާއިރު، ތަކެތީގެ އަގު އުފުލެމުންދާ ކަމުގެ ކަންބޮޑުވުން ގިނަ ބަޔަކު ދަނީ ފާޅު ކުރަމުންނެވެ.