މިއަހަރު 10 ރިސޯޓު ހުޅުވައި އެރިސޯޓްތަކުން 3500 އެނދު އަލަށް ފަތުރުވެރިކަމުގެ މާކެޓަށް ނެރެވޭނެކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.

ދައުލަތުގެ މީޑިއާގައި ވާހަކަދައްކަވަމުން މައުސޫމް ވިދާޅުވީ މިއަހަރުގެ ކުރިއަށްއޮތް ދުވަސްތަކުގެ ތެރޭގައި އިތުރު 10 ރިސޯޓެއް ރާއްޖޭގައި ހުޅުވޭނެކަމަށެވެ. އަދި މިއަހަރުގެ މިހާތަނަށް 2 ރިސޯޓެއް ހުޅުވިފައިވާކަމަށްވެސް މައުސޫމް ވިދާޅުވިއެވެެ.

މައުސޫމް ވިދާޅުވީ އަލަށް ހުޅުވިގެންދާ 10 ރިސޯޓާއެކު ރިސޯޓްތަކަށް 3500 އެނދު އިތުރުވެގެންދާނެކަމަށެވެ. ރިސޯޓްތަކުގެ އިތުރުން ގެސްޓް ހައުސްތަކުންވެސް އަހަރުގެ ކުރިއަށްއޮތް ތަނުގައި ގިނަ އެނދުތަކެއް މާކެޓަށް ނެރެވޭނެކަމަށް މިނިސްޓަރ ވިދާޅުވިއެވެ.

"ބާރު ސްފީޑްގައި ކުރިއަރައިގެން މިއަންނަނީ ގެސްޓްހައުސް ސެކްޓަރ. އޭގެ އެނދު އަޅުގަނޑުމެންނަށް ސީދާ ނަންބަރެއް ބުނާކަށް ނޭނގޭ. އަޅުގަނޑުމެންގެ ޕްލޭންގައި އިންނަކަމެއް ނޫން. އެހެންނަމަވެސް ޕްރައިވެޓް ސެކްޓަރއަށް އިތުބާރު ލިބޭ ވަރަކަށް އެބައި ވަރުގަދަވެގެންދާނެ. އެއަށް ސަރުކާރުން މިކޮށްދޭ ކަމަކީ އެތެރޭގެ ދަތުރުފަތުރުގެ ނިޒާމް ވަރަށް ފުރިހަމަކޮށްލަނީ" މިނިސްޓަރ ވިދާޅުވިއެވެ.

ރާއްޖޭގެ ފަތުރުވެރިކަން ކުރިއެރުވުމަށް ސަރުކާރުން ގިނަ މަސައްކަތްތަކެއް ކުރައްވަމުންދާއިރު، ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން މިމަހުގެ 7 ވަނަ ދުވަހުގެ ނިޔަލަށް ރާއްޖޭގައި 170 ރިސޯޓެއް އަންނަނީ އޮޕްރޭޓްކުރަމުންނެވެ. އެއީ ޖުމްލަ 40323 އެނދެވެ. އަދި 848 ގެސްޓްހައުސް އޮޕަރޭޓްކުރަމުން އަންނައިރު އެއީ ޖުމްލަ 15،797 އެނދެވެ.