ހުޅުމާލޭ ފޭސް 1 ގެ ފުލެޓަކުން މީހަކު ވެއްޓި، އޭނާއަށް ހޮސްޕިޓަލުގައި ފަރުވާ ދެމުން ދާކަމަށް ފުލުހުން ބުނެފިއެވެ.

މި ހާދިސާއާއި ގުޅޭ މައުލޫމާތު ހިއްސާ ކުރަމުން ފުލުހުން ބުނީ، ހުޅުމާލޭ ފޭސް 1 ގެ ފުލެޓެއްގެ 3 ވަނަ ފަންގިފިލައިން އަންހެނަކު ވެއްޓިފައިވާކަމުގެ މައުލޫމާތު މިއަދު ހަވީރު 5:30 ހާއިރު ފުލުހުންނަށް ރިޕޯޓު ކޮށްފައިވާ ކަމަށެވެ.

ފުލުހުން ބުނީ، މި ހާދިސާގައި ވެއްޓިފައިވަނީ އުމުރުން 22 އަހަރުގެ ދިވެހި އަންހެނެއް ކަމަށެވެ. އަދި އޭނާއަށް މިހާރުދަނީ ހުޅުމާލޭ ހޮސްޕިޓަލުގައި ފަރުވާ ދެމުންކަމަށް ވެސް ފުލުހުން ވަނީ ބުނެފައެވެ.

މި ހާދިސާ ހިނގީ ކިހިނެއްކަމެއް އަދި ފުލުހުން ހާމަ ކޮށްފައެއް ނުވެއެވެ.