އައްޑޫ ސިޓީ ފޭދޫގައި ހިނގި މާރާމާރީއާ ގުޅިގެން ހައްޔަރު ކުރި ފަސް މީހުންގެ ތެރެއިން ތިން މީހަކު ދޫކޮށްލައިފިއެވެ.

މައުލޫމާތު ލިބިފައިވާ ގޮތުގައި މި މީހުން ދޫކޮށްލާފައިވަނީ ކޯޓުން މިއަދެވެ.

ތޫނު އެއްޗަކުން ހަމަލާދީ ބިންގި މިމާރާމާރީގައި އަނިޔާލިބުނު ޒުވާނާކު ވަނީ ނިޔާވެފައެވެ. މާރާމާރީއާއި ގުޅިގެން ފޭދޫ ސޮލިޑް އުމުރުން 21 އަހަރުގެ މުޙައްމަދު ޒަޔާން މޫސާ ނިޔާވީ އައްޑޫ އިކުއިޓޯރިއަލް ހޮސްޕިޓަލްގައި ފަރުވާ ދެމުން ދަނިކޮށެވެ.

އެ މައްސަލާގައި އުމުރުން 15 އަހަރާއި 16 އަހަރުގެ ދެ ކުއްޖަކު ފުލުހުންވަނީ ހައްޔަރުކޮށްފައެވެ. އަދި އަމާންކަން ނަގާލަން އުޅުމުގެ ތުހުމަތުގައި ވެސް ބަޔަކު ހައްޔަރުކުރިއެވެ.

މިއަދު ދޫކޮށްލި ތިން މީހުންނަކީ މާރާމާރީއާއި ގުޅިގެން ރަށުގެ އަމާންކަން ނަގާލުމަށް މަސައްކަތް ކުރިކަމުގެ ތުހުމަތުގައި ހައްޔަރު ކުރި ތިން މީހެކެވެ.

ހަމަލާގައި މަރާލި ޒަޔާންގެ ގައިގެ އެތައް ތަނަކަށް ވަނީ ތޫނުއެއްޗަކުން ހަމަލާދީފައެވެ. ހޮސްޕިޓަލާއި ހަވާލާދީ މީގެ ކުރިން ފުލުހުން ބުނެފައިވަނީ އޭނާގެ އަތުގެ މުލައްދަނޑިއަށާއި ބުރަކަށްޓަށް ތޫނު އެއްޗަކުން ހަމަލާ ދީފައިވާކަމަށެވެ.