މާލޭ ސަރަހައްދުގައި ދިރިއުޅޭ ފަރާތްތަކުން ޕިކްނިކް ގޮސްލުމަށް މި ސަރުކާރުން ތަރައްގީ ކުރާ ޕިކްނިކް އައިލެންޑްގެ މަސައްކަތް ހިނގަމުންދާ ގޮތް ރައީސް އިބްރާހީމް މުޙައްމަދު ޞާލިޙް މިއަދު ބައްލަވާލައްވައިފިއެވެ.

ކ. ކުޑަގިރި ފަޅުގައި ތަރައްގީކުރާ މި ރަށަށް މިއަދު ހަވީރު ކުރެއްވި ޒިޔާރަތުގައި ރައީސް އަރިހުގައި، ނާއިބު ރައީސް ފައިޞަލް ނަސީމް އަދި ސަރުކާރުގެ ބައެއް އިސްވެރިންގެ އިތުރުން ސަރުކާރު ގިނަ ކުންފުނިތަކެއްގެ ވެރިން ބައިވެރިވެވަޑައިގެންނެވިއެވެ.

ރައީސް ޞާލިޙް އެ ރަށަށް ކުރެއްވި ޒިޔާރަތުގައި ޕިކްނިކް އައިލެންޑެއްގެ ގޮތުގައި އެ ރަށް ތަރައްގީ ކުރުމަށް ކުރަމުން ގެންދާ މަސައްކަތްތައް ބައްލަވާލެއްވިއެވެ. އެގޮތުން އެ ރަށުގައި ފެނަކައިގެ ފަރާތުން އިމާރާތް ކުރަމުންދާ އިންޖީނުގެ ބައްލަވާލައްވާފައި ވެއެވެ. އަދި އެ ރަށް ފެހި ކުރުމުގެ ގޮތުން ކުރިޔަށް ގެންދާ ގަސް އިންދުމުގެ ޕްރޮގްރާމްގައި ބައިވެރިވެވަޑައިގެން އެރަށުގައި ގަސް އިންދަވާފައިވެއެވެ.

President @ibusolih visits the picnic island development site on Kudagiri Island in the Kaafu Atoll and assesses the projects’ progress. He also joined in tree planting activities held to make the island greener. pic.twitter.com/WZZ9JysT0B

— The President's Office (@presidencymv) June 16, 2022

މިއީ ރައީސް ޞާލިޙްގެ ވައުދުފުޅުތަކުގައި ހިމެނިގެން އެމަނިކުފާނު ހާއްސަ އިސްކަމެއް ދެއްވައިގެން ކުރިޔަށް ގެންދަވާ މަޝްރޫއެކެވެ. މި މަޝްރޫއުގެ ބިން ހިއްކުމުގެ މަސައްކަތް އެމްޓީސީސީއާއި ހަވާލު ކޮށްގެން ކޮށްފައިވާއިރު އެނޫން ގިނަ މަސައްކަތްތައްވެސް ހަވާލު ކޮށްފައިވަނީ ސަރުކާރު ހިއްސާވާ ކުންފުނިތަކަށެވެ.