ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ށ. ފުނަދުއަށް ވަޑައިގެންފިއެވެ.

ރައީސް ޞާލިހު ފުނަދުއަށް ވަޑައިގެންނެވީ މި ހަފްތާ ބަންދުގައި ށ. ފުނަދުއާއި، ނ. ހޮޅުދޫއަށް އެމަނިކުފާނު ކުރައްވާ ދަތުރުފުޅުގެ ތެރެއިންނެވެ. މި ދަތުރުފުޅަކީ ދެ ރަށުގެ ސްކޫލުގެ އަހަރީ ދުވަސް ފާހަގަކުރުމަށް ބާއްވާ ޖަލްސާތަކުގައި ބައިވެރިވެ ވަޑައިގެންނެވުމަށް އެމަނިކުފާނު ކުރައްވާ ދަތުރުފުޅެކެވެ.

އެމަނިކުފާނު ފުނަދޫއަށް ވަޑައިގެންނެވުމުން އެރަށުގެ ރައްޔިތުންނާއި ކައުންސިލުން ވަނީ އެމަނިކުފާނަށް ހޫނު މަރުހަބާއެއް ކިޔާފައެވެ. އެމަނިކުފާނުގެ އިސްތިގުބާލުގައި އެ ރަށު ބަނދަރުމައްޗަށް ވަރަށް ގިނަ އަދަދެއްގެ ބަޔަކު ވަނީ ޖަމާވެފައެވެ.

މައުލޫމާތު ލިބިފައިވާ ގޮތުގައި، އެމަނިކުފާނުގެ މި ދަތުރުފުޅުގައި މިއަދު ފުނަދޫ ކައުންސިލް މެމްބަރުންނާއި އަތޮޅު ކައުންސިލް މެމްބަރުންނާ ބައްދަލުކުރައްވާނެއެވެ. އަދި އެ ރަށު ސްކޫލްގެ ރަންޔޫބިލް ފާހަގަކުރުމަށް ބާއްވާ ޖަލްސާގައި މިރޭ ބައިވެރިވެވަޑައިގަންނަވާނެއެވެ.

ފުނަދުއަށްފަހު އެމަނިކުފާނު ދެން ވަޑައިގަންނަވާނީ ނ. ހޮޅުދުއަށެވެ. އެ ރަށަށް ވަޑައިގެން އެރަށު މޭނާ ސްކޫލްގެ އަލިމަސް ޔޫބިލް ފާހަގަކުރުމަށް މާދަމާ ރޭ ބާއްވާ ހާއްސަ ޖަލްސާގައި ވެސް އެމަނިކުފާނު ބައިވެރިވެ ވަޑައިގަންނަވާނެއެވެ.