ކޮވިޑް ކޭސްތައް އިތުރުވި ނަމަވެސް ލޮކްޑައުން ކުރުމުގެ ވިސްނުމެއް ނެތް ކަމަށް ސިއްޙަތާބެހޭ ވަޒީރު އަޙްމަދު ނަސީމް މިއަދު ވިދާޅުވިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ކާށިދޫ ދާއިރާގެ މެންބަރު ޢަބްދުﷲ ޖާބިރު ވަނީ ކޮވިޑް ކޭސްތައް އިތުރުވަމުން އައުމާގުޅިގެން ރާއްޖެ އަލުން ލޮކްޑައުން ކުރުމުގެ ވިސްނުން ގެންގުޅުއްވަންތޯ ވަޒީރު އަރިހުން ސުވާލު އައްސަވާފައެވެ.

އެ ސުވާލުގެ ޖަވާބުގައި ސިއްޙަތާބެހޭ ވަޒީރު އަޙްމަދު ނަސީމް ވިދާޅުވެފައިވަނީ ލޮކްޑައުން ކުރުމުގެ ވިސްނުމެއް ސިއްޙަތާބެހޭ ވުޒާރާއިން ނުގެންގުޅޭ ކަމަށެވެ. އަދި އެއީ ކުރަން ބޭނުންވާކަމެއް ނޫން ކަމަށްވެސް ވަޒީރު ވިދާޅުވިއެވެ.

"އިޤްތިޞާދު ހިނގަން ޖެހޭނެ. އެހެންވީމާ އަޅުގަނޑުމެން ކޮރޯނާ ވައިރަހާއެކީ އުޅެން ދަސްކުރަންޖެހޭ." ނަސީމް ވިދާޅުވިއެވެ.

ދާދިފަހުން އެޗްޕީއޭއިން ބުނެފައިވަނީ ވޭތުވެދިޔަ މަސްތަކުގައި ކޮވިޑް ކޭސްތައް ރާއްޖޭގައި މަދުވެފައި އޮތުމަށްފަހު އަނެއްކާވެސް ކޭސްތައް އިތުރުވަމުންދާ ކަމަށެވެ. އެގޮތުން މިދިޔަ ހަފްތާގައި 1202 ކޭސް ފެނިފައިވާ ކަމަށް އެޗްޕީއޭ އިން ވަނީ ހާމަކޮށްފައެވެ.

މީގެ އިތުރުން ކޮވިޑް ޖެހިގެން ހޮސްޕިޓަލުގައި އެޑިމިޓްކޮށްގެން ފަރުވާދޭ މީހުންގެ އަދަދު ވެސް މިހާރު ދަނީ އިތުރުވަމުންނެެވެ.

އެޗްޕީއޭއިން ނެރުނު ބަޔާނެއްގައި ވަނީ ކޮވިޑްގެ ހާލަތު އަލުން ގޯސްވިޔަ ނުދިނުމަށް ބަލީގެ އެއްވެސް އަލާމާތެއް ފެނިއްޖެނަމަ، އެކަހެރިވެ ޓެސްޓުތައް ހެދުމަށާއި އަދި މާސްކް އަޅަން އިލްތިމާސްކޮށްފަވެ.