ދިރުވާލައިގެން ރާއްޖެއަށް މަސްތުވާތަކެތި އެތެރެކުރި ދެ ބިދޭސީއެއްގެ ބަނޑުގައި ހުރި ހުރިހާ ބްލެޓްތަކެއް ނެރެވެންދެން އެ މީހުންގެ ބަންދަށް ފަސް ދުވަސް ކްރިމިނަލް ކޯޓުން ޖަހައިފިއެވެ.

ނޮދަރން އަޔަލޭންޑްގެ ދެ މީހަކު މަސްތުވާތަކެތި ދިރުވާލައިގެން ރާއްޖެއަށް އެތެރެކުރި މައްސަލައަކާ ގުޅިގެން އެ މީހުންގެ ބަނޑުގައި ހުރި 240 ބުލެޓު ނެގެންދެން ބަންދުގައި ބޭތިއްބުމަށް ކްރިމިނަލް ކޯޓުން އަމުރުކޮށްފައިވަނީ އެމީހުންގެ ޣައިރު ޙާޟިރުގައެވެ. އެމީހުން މިހާރުތިބީ އައިޖީއެމްއެޗްގައި އެޑްމިޓް ކޮށްފައެވެ.

މި ދެމީހުންކުރެ ކޮންމެ މީހެއްގެ ބަނޑުގައި 120 ބްލެޓް އޮތްކަމަށް ކޯޓުގައި ފުލުހުންވަނީ ބުނެފައެވެ. އެ އެއްޗެހި ނެރުމުގެ މަސައްކަތް މިހާރު ކުރަމުންދާއިރު މިހާތަނަށް ނެރެވުނީ 25 ބްލެޓެވެ. އެއީ އެކަކުގެ ބަނޑުން 13 ބުލެޓާއި އަނެއް މީހާގެ ބަނޑުން 12 ބްލެޓެވެ.

ފަސްދުވަހަށް އެމީހުން ބަންދުކޮށް ކޯޓުން ދީފައިވާ އަމުރުގައި ވަނީ ބްލެޓްތައްނެރެ ނިމުމުން އެ މީހުން ކޯޓަށް ހާޒިރުކުރަން ފުލުހުންގެ މައްޗަށް އަމުރުކޮށްފައެވެ.