އައްޑޫ ސިޓީގެ އެކި ރަށްތަކަށް ވަރަށް ބޮޑަށް އުދަ އަރައި ބޮޑެތި ގެއްލުންތަކެއް ވެއްޖެއެވެ.

މޫސުން ގޯސްވެ ވައިގަދަވުމާއިއެކު ކަނޑުތައްވެސް ގަދަވެފައިވާތީ، އައްޑޫގެ އެކި ރަށްތަކަށް އެކި ހިސާބުތަކުން ދަނީ ވަރަށް ބޮޑަށް އުދަ އަރަމުންނެވެ. އެގޮތުން މީހުން ދިރިއުޅޭ ބައެއް ގޭބިސީތަކަށް ވެސް ލޮނުވަދެފައިވާކަމަށް މައުލޫމާތު ލިބެއެވެ.

މިއަދު އަރަމުންދާ އުދައާއި ގުޅޭގޮތުން އައްޑޫ ސިޓީގެ މޭޔަރު ޢަލީ ނިޒާރު ވިދާޅުވީ، އައްޑޫގެ ހުރިހާ އަވަށްތަކަށް އުދަރައަރަމުން އެބަ ދާކަމަށާއި ބައެއް ގޭގެއަށް ވެސް ބޮޑެތި ގެއްލުންތައް ލިބެމުން އެބަ ދާކަމަށެވެ. އަދި ގެތަކުން ފެން ހިއްކުމަށް އެމްއެންޑީއެފްގެ އެހީތެރިކަމަށް އެދިފައިވާނޭކަމަށާއި ކައުންސިލާއި ޕަބްލިކް ވޯކްސް ޔުނިޓް ގުޅިގެން އެކަމުގައި ދެވެން އޮތް ހުރިހާ އެއްބާރުލުމެއް ދޭން މިހާރުވެސް މަސައްކަތް ކުރަމުން ދާކަމަށް އޭނާ ވިދާޅުވިއެވެ.



އުދައިގެ ސަބަބުން ލިބޭ ގެއްލުން ވީހާވެސް ކުޑަ ކުރުމަށްޓަކައި، އެންމެހާ ރައްޔިތުންގެ އެހީތެރިކަމާ އެއްބާރުލުން ބޭނުންވާކަމަށް ވެސް މޭޔަރު ނިޒާރު ވަނީ ވިދާޅުވެފައެވެ.

އުދަ އެރުމާއި ގުޅިގެން އައްޑޫ ސިޓީއަށް ލިބުނު ގެއްލުމުގެ އިތުރު ތަފްސީލެއް އަދި ލިބިފައެއް ނުވެއެވެ.

ރާއްޖެއަށް މިހާރު ކުރަމުންދާ ހުޅަނގު މޫސުމުގެ ވިއްސާރައިގައި، ކަނޑުތައް ގަދަވެ އުދައަރާނެކަމަށް ލަފާކުރެވޭކަމަށް މޫސުމާ ބެހޭ ގައުމީ އިދާރާއިން ވަނީ ބުނެފައެވެ.