ގދ. މަޑަވެއްޔާއި ހޯނޑެއްދޫ ގުޅާލުމަށް އަޅާފައިވާ ކޯޒްވޭ އަނެއްކާވެސް ކަނޑާލައިފިއެވެ.

އެއް ފަޅެއްގައި އޮންނަ ގދ. މަޑަވެއްޔާއި އެ އަތޮޅު ހޯޑެއްދޫ ގުޅައިލުމަށް ހަދާފައިވާ ކޯޒްވޭ، ކަނޑާލާފައިވަނީ އިއްޔެއިން ފެށިގެން މަޑަވެއްޔާއި ހޯނޑެއްދޫއަށް އުދައަރަމުންދާތީ އެކަމަށް ޙައްލެއް ހޯދުމުގެ ގޮތުންނެވެ.

އިއްޔެ މަޑަވެއްޔާއި ހޯނޑެއްދޫއަށްވެސް ވަނީ ވަރަށް ބޮޑަށް އުދަ އަރާފައެވެ. އުދައިގެ ސަބަބުން މަޑަވެލީގެ 98 އިންސައްތަ ގެއަށް އުދައިގެ އަސަރުކޮށްފައިވާ ކަމަށް ޑިޒާސްޓަރ މެނޭޖްމަންޓް އޮތޯރިޓީން މައުލޫމާތު ދީފައިވެއެވެ.

މި ދެ ރަށުގެ ދޭތެރޭގައި ކޯޒްްވޭއެއް އެޅީ 2016 ވަނަ އަހަރުގައެވެ. އެ ޕްރޮޖެކްޓަށް ދައުލަތުގެ ބަޖެޓުން 29 މިލިއަން ރުފިޔާ ޚަރަދު ކުރިއެވެ. އެ ދެ ރަށް ގުޅުވައިލައިފައިވަނީ އެ ދެމެދުގައި އޮންނަ ހާދޫ ކިޔާ ފަޅު ރަށެއް ހިމަނައިގެންނެވެ. މި ކޯޒްވޭގެ ދިގުމިނުގައި 440 މީޓަރު ހުންނައިރު ފުޅާމިނުގައި ހުންނަނީ ހަތް މީޓަރެވެ.

މީގެ ކުރިން ވެސް ހޯޑެއްދޫގެ ރައްޔިތުން ވަނީ 2018ވަނަ އަހަރުގެ ސެޕްޓެމްބަރު މަހު ނުކުމެ ކޯޒްވޭ ކަނޑާލައިފައެވެ. އެ ފަހަރު ކޯޒްވޭ ކަނޑާލީ ކޯޒްވޭގެ މަތިން ލޮނުގަނޑު ރަށުތެރެއަށް އަރައި ރަށް އަޑިއަށް ދާތީ ކަމަށް އެ ރަށު ރައްޔިތުން ބުންޏެވެ. އޭގެ ފަހުން 2021 ވަނަ އަހަރު އޮގަސްޓް މަހު ވެސް އެ ކޯޒްވޭ ވަނީ ކަނޑާލާފައެވެ. މިއީ މަޑަވެލި-ހޯނޑެއްދޫ ކޯޒްވޭ ކަނޑާލި ތިންވަނަ ފަހަރެވެ.

ކޯޒްވޭގެ ސަބަބުން އުދައަރާ މައްސަލަ ހައްލުކުރުމަށްޓަކައި އޮއި ދެމޭ ގޮތަށް ކޯޒްވޭ އަލުން ހެދުމަށް މިދިޔަ އަހަރު އޮކްޓޫބަރު ސަރުކާރުން ވަނީ އެމްޓީސީީސީއާ ހަވާލުކޮށްފައެވެ. 300 ދުވަހުން ނިންމާގޮތަށް ދައުލަތުގެ ބަޖެޓުން 82 މިލިއަން ރުފިޔާ ހަރަދު ކުރާ މި މަޝްރޫއުގެ މަސައްކަތް އަދި ފަށާފައެއް ނުވެއެވެ.